Phet krad 13 hajar ngut ki nongbylla, na Garo Hills

Shillong, 26 Jylliew:
Kumba 13 hajar ngut ei ei ki nongbylla bar jylla kiba don ha kylleng ka ri lum Garo ki la bteng ka jingpher krad noh haduh hynne ka sngi hadien ba la shah siat iap 8 ngut ha kane ka sngi u Blei ha South Garo Hills ha ki runar.
U heh sorkar mynta ka sngi, u iathuh ba ki nongbylla bar jylla kiba don ha kylleng ki jaka ha rilum Garo ki la bteng ban pher krad mynta ka sngi ruh, khamtam kito kiba dei na Assam namar ka jingtieng hadien ka jingjia.
“La khein antad kumba 13,000 ngut ki nongbylla ki la phet na Garo Hills haduh hynne ka sngi Balang hadien ba la shah siat iap ki 8 ngut ki nongbylla tih dewiong kiba dei na Assam” la ong u heh sorkar.
Ha kajuh ka por, ka sorkar pdeng ka la phah sa hynriew kompani ki pulit CRPF bad saw kompeni ki Border Security Force (BSF) bad ar kompeni ki Central Reserve Paramilitary Force sha Garo Hills ban pynneh ia ka shong sain bad ka ain ka nun.
“Ka jinglong jingman ka jur bha ha ka rilum Garo Hills, hynrei kam shym don kano kano ka jingjia bad ngi la peitngor bha ia ka jinglong jingman” la ong u Commissioner ka Divisions ba peit ia ka Garo Hills, u Peter W Ingty.
La pynjari ruh da ka kyndon Section 144 jong ka Indian Penal Code (IPC) kaba khang pyrshah ban ialum saw ki briew ha kajuh ka jaka ha South bad ha East Garo Hills. Katba ha West Garo Hills, ka korphiew ba phra kynta ka dang treikam ba la pynjari naduh ka sngi Thohdieng.
Ha kane ka sngi u Blei, phra ngut ki nongbylla tih dewiong ki la shah siat iap ha ki runar ha shnong Garegittim kaba don ha thain Nongalbibra ha South Garo Hills district.