Phet Congress noh U Prof Don

Shillong, 21 Naitung:
U Prof Donkupar War u la iehnoh ia ka party Congress na ka jinglong dkhot hadien ba u la thait ia ka jingtreikam jong ka party kaba long pyrshah ia ka jingangnud jong ki nongkitkam bad ki paidbah nongthep vote.
Ha ka shithi ba la phah sha u President ka MPCC u Bah DD Lapang, u Prof Don, u la ong ba, “Nga thoh da kane ka shithi ia ka rai jong nga ban iehnoh noh na ka jinglong dkhot jong ka Indian National Congress. Kane ka dei ka rai la shim hadien ba la mih ka kynrum kynram dang shen ha ka party kaba ktah jur ia ka dur ka party bad ia ki dkhot bad ki paidbah”, la ong ka shithi u Prof Don.
U Prof u la long u President barim ka Mission Unit Congress Committee, President ka Mawkhar Block Congress, u President ka Shillong City Congress, u President badworking president ka North Shillong Block Congress, u Sr President ka Shillong City Congress, u chairman ka Self Government Cell ka MPCC, u chairman ka Rajiv Gandhi Study Circle, ka MPCC.