Shillong 04 Iaiong: Hapdeng ka jingiaid paidbah lane ka Rally, ka ba la long mynta ka sngi thohdieng ka 04 Tarik Iaiong 2025, jong ki Dkhot ka seng KSU ha Khliehriat, East Jaintia Hills District, ki pulit ki ba ap pahara ha ki surok ki la Shah kawang maw.
Kumjuh ruh katba ki Pulit Khliehriat ki dangieng ha Phyllaw jong ka Police Station, ki la Shah kawang maw kynsan kynsan katba ka jingiaid paidbah ka dangiaid bad shirhem bha, ha kaba ki Dkhot ka seng ki la poi palat hajar ngut tam eiei, ka ba la jia ha kapor kumba 1:40 eiei.
Lyngba ki durkhih la iohi, ba ki Pulit mar shu iohi ia ka jingshah kawang maw ki la don ki ba la mareh bad pher krat ban rung noh shapoh, katba kidon pat ki pulit ki ba ieng hajuh khlem khih, ha kaba tang katta kattne minit la wan poi noh ki nongialam ban tehlakam ia ki.
Ki maw ki ba la her sha suin ba la kawang ha kapor ba iaid paidbah ka KSU, ki la leit dei beit beit ia ki kali jong ki pulit ki ba ieng pahara ha katei ka jaka.
Ha kane ka jingiaid paidbah ka seng KSU, ki khun samla ki la pyrta da kaba ong, ” Ia u mynder ngin ia kynther”, ia u pulit ngin ia khyrwit”. Kalong ruh shibynta ban pyrshah jur ka ka jingthmu ka sorkar jylla ban wanrah ia ka lynti.
Ka jingiaid paidbah nyngkong ka danglong ka ba jai jai bha, ka ba la sdang naduh madan Khliehriat ter ter bad ha kapor, ba ki Dkhot ka seng ki la poi ha Iew Khliehriat, namar ki Pulit ki iingbeit ha surok khlem khih, ka ba la pynbitar ia ki Dkhot ka seng, ha kaba ki la don ki ba shimkabu ban kawang da u Maw najrong pyrshah ia ki pulit.
“Ym tang ba ki riewshimkabu ki la kawang maw ia ki pulit, hynrei ki la kawang ruh ia ki bar jylla, ki ba ieng peitkai najrong iing bad na ki dukan ia ka jingiaid paidbah ka seng KSU, ha kaba mar kumta ki bar jylla ki la krat bad mareh ban rieh ban lait na ka jingmynmaw”.
Ki dukan bar jylla ha baroh ka thain Khliehriat ki la khang khyrdep lut baroh naduh dangstep phyrngap, namar ki tip ba kadon ka jingialang jong ka seng KSU.
Lasakhi ba hapdeng ka jingher kimaw najrong ba la don ba kawang ha ka jingiaid paidbah ka KSU, ki nongialam ki la pynjai jai ba kin sangeh ban kawang maw, hynrei la shu iohsngew ba sawa ba riew ki maw ja shilynter ka surok bah.
Hadien kane ka jingiaid paidbah ka ladon ka jingialang ha u Motdur sahnam ba shirynieng jong u Kiang Nangbah, ha kaba ki nongialam na ki seng bapher bapher ki la ai jingkren ha kane ka sngi.
Ki nongialam haba kren sha katei ka jingialang ki la ong, ba katba ki dangialeh ban pan ia ka ILP, ka ba long ban iada ia ka jaitbynriew, hynrei ka sorkar jylla ka dangpynthied jaka pynban ia ki bar jylla ban shna karkhana bad ban thmu ruh ban wanrah ia kata ka lynti rel.
Lada ka jylla kam pat don ia ki ain ban iada na a jingwanrumg kyrthep ki briew ba nabar, ka lynti rel kadei ka bih bsein ka ban puh ia ka Ri bad ka jaitbynriew jongngi, ki la ong. Ki la ong ruh, ba nai pat kwah khohreh ban wanrah ia ka lynti rel hapoh ka jylla, katan ym pat don ia ki ain ba skhem ban iada ia ka jaitbynriew.
Shuh shuh Ki la pynpaw, ba ka sorkar India mynta la 12 tylli ki snem ka dangpule sah ia ka resolution ILP ka ba don tang kumba 12 sla eiei.
Phi don ban ong eiei?