Phasi u nongrep ialade, bym ioh pisa

Shillong, 12 Nohprah:
Ha kawei ka jingjia kaba kham pher uwe iu nongrep na ri Lum Garo u la phasi noh ialade tang na ka daw ba u khlem ba pyndep ia ka kular jong u kata ban pynphai biang ia ka ram jong u paralok T.10 hajar tyngka kaba u la ia kut ban siew hapoh 3 sngi. Ym pat lah ban tip hato dei na kawei pat ka daw ba utei u rangbah u la phasi ialade ne dei na ka jingktah na ka jingsha hpynduh 500 bad 1000 ha ka sorkar India hynrei kiba haing hasem jong u ki la kynnoh beit ba dei na ka jingpynduk ia ka kot 500 bad 1000.
U Wajning G Momin, 50 snem karta na ka shnong Sindilgre SWGH u dei u nongrep u bym ju pynlang pisa ha bank hynrei namar ka jingtreikam ka jingpynduh kot 500 bad 1000 u la leit ban plie account ban thep ia ka T.50 lak tyngka kaba mih na ki jingdie jong u ia ki mar-rep.
U la sdang ban tei ing hynrei u hap ban pynsangeh noh ia ka jingte iing naba um ioh ban siew pyndep ia ka bai bylla jong ki nongbylla sngi.
U la leit ban sei pisa na bank ban siew ia ka bainong ki nongbylla hynrei um ioh bad ha ka jingsngewlehraiñ bym lah ban siew ia ka bai bylla nongsngi ki briew u la leit pan ram na u paralok jong u T.10 hajar tyngka ban siew ia katei ka bai bylla bad u da kular ba un pynphai noh hapoh 3 sngi. Kiba haing hasem jong u ki la ong ba kane ka dei ka sien ba nyngkong ba un shim ram hynrei um ju shim ram ha ka jingim jong u. Hadien u la leit sha Ampati ka shnong kaba jngai 19 nkilomitar na ka jaka ba u sah ban sei pisa T.20 hajar tyngka napoh Account jong u hynrei haba la poi hangtei ka bank ka ong bym don pisa bad ka ai ia u tang T.6 hajar tyngka, Kumta la ong ba u la sngewlehraiñ bym lah ban pynphai ia ka pisa ba shim na u paralok kumba la ia kut bad namar ka jinglehraiñ u la phas inoh ialade, ong ki bahaing hasem.
Kiba haing jong u ki la bitar halor katei ka jingjia bad ki la dawa na ka sorkar ba kan siew bai lutksan lym kumta ki la byrngem ruh ban leit ujor sha ing bishar. Katba u MLA ka thain ba u sah pat u Winnerson D Sangma u la ong ba dei ban pynkiew ia ka rukom sei pisa ki briew ka thain shatei Lam mihngi namarba mynta ka la dei ka por lehkmen Kristmas jong ki.