Phai sha ka kam rep, ka kyntiew ia ka ioh ka kot ka Jylla, ong ka Director

Khliehriat: Ka Ophis jong ka District Horticulture, East Jaintia HIlls ka la pynlong ia ka jingpyni-rong ia ki soh bad ki jingber (musla) ha Khliehriat mynta ka sngi.

Ka Director ka tnad Horticulture, ka kong Sainara Nongbet, ka la long ka kongsan katba u Chairman ka JHADC u Dr. Sankey Shangpung u la long u symbud kongsan.

Haba kren kum ka kongsan, ka kong Nongbet ka la ong ba ka kam rep kam riang ha ka jylla bad khamtam ha East Jaintia Hills ka la kiew bha mynta ha ki khyndiat snem ba la leit.

Ka la kyntu bad pynshlur ruh ia ki paidbah ban phai sha ka kam rep namar ka long ka kam kaba ai jingmyntoi bad kaba kyntiew ia ka ioh ka kot ha ka jylla khamtam ha ki soh ki pai bad kiwei kiwei nalor ka kam ri jingri.

Haba kren halor ka jingthung ia ki soh ki pai, ka Director ka la ong ba u Soh Niamtra Khasi Mandarim u long uba la pynmih na ka District u long uba thiang bad uba bang bha bad uba la ioh ruh ia ka jingithuh.

Ka la kren ruh shaphang ka Mission Value Chain Development for North Eastern Region (MOVCD- NER) a Central Sector Scheme bad ka la iathuh ba lyngba kane ka skim ar tylli ki Company kiba pyniaid ia ki mar rep kaba la tip kum ka Farmers Producers Company (FPC).

Kala la kyntu ruh ia ki nongrep bad kin wad hi ia ki lad ki lynti kiba thymmai katkum ka juk stad ha ka kam rep kam riang da kaba iatreilang ruh ba ka ophis ka DHO bad DAO.

Katba na ka liang u Dr. Sankey Shangpung, u la ong ba ka kamrep kam riang ka long ka kam kaba uba rim bajah ula im ban kamai ban pyndap ha iing ha sem bad u la ai ruh ka jingiaroh halor ka jinglah ban pynmih ia bun jait ki Soh bad ki musli musla kiba lah ban ioh ha ki iew ki hat hapoh ka District bad shabar ruh.

Ha katei ka jingpyni rong ia ki soh bad ki jingber, la ia shim bynta da ka ki tnad sorkar bad ki nongrep kiba la wanrah ruh ia ki soh ba bun jait, ki jhur, ka Dohkha Syang bad kiwei kiwei ki mar rep.

Kiwei pat kiba la ai jingkren ka kynthup ia ka District Horticulture Officer, East Jaintia Hill District, WC Pariat, District Agriculture Officer, East Jaintia Hill District, W Challam, ka Superintendent of Fisheries, East Jaintia Hill District, Hubert Kharbuki, Dr. F. Langstang, Animal Husbandry and Veterinary Officer, East Jaintia Hill District bad ka P.S Suchen, Assistant Director, Horticulture Department, East Jaintia Hill District.