Phah weng u myntri ka tnad Municipal, ia ka hukum ban khrong musur na ki nongrep

Shillong: U Myntri ba dei peit ia ka tnad Muncipal Affair u bah Hamletson Dohling mynta ka sngi u la khot ia ka jingialang kaba kyrkieh ia ki heh jong kane ka tnad sorkar bad u la hukum ban weng noh ia ka jingbthah ban khrong bai musur na ki nongrep kiba wan die ia ki mar rep ha Anjalee Parking Lot.

U bah Hamlet u la pyntip ba ha ka rai ba la shim mynta ka sngi la phah ban weng noh ia ka jingbthah kaba la pynmih ha ka 16 tarik u Naitung 2020 kaba la bthah ban khrong bai musur na ki nongrep ki ba wan die ia ki marrep ha Anjalee parking lot bad naduh la shai ka sngi kan ym don shuh kano kano ka jingkhrong musur na ki nongrep ha katei ka jaka.

U Myntri ba dei peit ia ka kam pynroi sor u la ong ba um kwah ban iohi ia ka jingeh ka ban ban ia ki nongrep jong ka jylla bad kum juh ki briew kiba don bynta ha kaba dei bad ki nongrep.

Haba iadei bad ka khuid ka suba, ha katei ka jaka ieng kali u la bthah ban khot ia ka jingialang hapdeng ki briew jong ka Shillong Municipal, ki nongkhaii bad ki nongrep kumno ba kin leh ban pynkhuid ia kane ka jaka ba kan ym mih kano kano ka jingjaboh ha katei ka jaka.

Ha kawei pat ka khubor, u myntri u ba dei peit iaka tnad ka rep ka riang ha ka jylla u bah Banteidor Lyngdoh mynta ka sngi u la iathuh ba yn sa phah tohkit halor ka jingphah khrong jong ka tnad Municipal ia ka bai Musur na ki nongrep ba wan die ia ka mar rep ha Anjali parking lot.

Haba iakren bad ki lad pathai khubor u bah Banteidor Lyngdoh u la pynpaw ka jing sngew khia ba ka tnat Municipal, ka nud ban phah lum ia ka bai musur na ki nongrep khamtam ha kum kane ka por ba baroh ki mad ia ka jingeh na kadaw ka khlam COVID-19.

U bah Banteidor Lyngdoh u la iathuh ruh ba halor ka jinglum bai musur na ki nongrep ym shem la don jing tip bad halor kane ka bynta un sa ia kren bad u myntri rangbah ka jylla u Conrad K Sangma, ban pynsngew halor ka jing lum ia ka bai musur jong ka Municipal na ki nongrep.

U la ong ruh ba kano kano ka tnat treikam ka sorkar kam lah ban phah lum bai musur na ki paidbah ne ki nongrep khlem da ia syllok shwa bad ki tnat treikam kiba dei khmih ia kine ki bynta.