Phah u bah Ardent ban leit ia treilang bad ka BJP, ong u bah Samlin

Shillong: U MLA ka Sohiong konstitwensi u bah Samlin Malngiang, uba dei ruh u myntri sorkar jylla u la ong ba dei u bah Ardent M Basaiawmoit uba la phah ia ki 2 ngut ki MLA ka HSPDP kata ma u bad u bah Renikton ban leit ia treilang bad ka BJP. U bah Samlin u la ong ba u bah Ardent ha kato ka por ba u dang dei u President ka HSPDP u la bthah ia ki ban leit ia treilang naba ki la ia treilang bad ka UDP naduh ki por elekshon.
“Ngam tip pat na kano ka daw ba u bah Ardent u kylla ktien noh ha shuwa ba ngan leit bam smai ia ka kam myntri ha ing u Lat” ong u bah Samlin. Ha ka jingialap elekshon ha Nongspung na ka bynta u kyrtong ka HSPDP u bah Sherborlang Mawlong kaba la long mynta ka sngi u bah Samlin u la pynpaw ka jinglyngngoh ban iohi ba u bah Ardent u kiew rynsan ha Sohiong ban ialap elekshon ia u kyrtong jong ka seng Congress bad u la ong ba ha katei ka jingialap elekshon u la kynnoh ia ki MLA ka HSPDP ba kim burom shuh ia u da kaba leit ban ia treilang bad ka BJP.
Lah ban kdew ba u bah Ardent M Basaiawmoit u la iehnoh ia ka kam President ong ka HSPDP bad u la iehnoh ruh ia ka seng HSPDP bad u la ong ba ka daw ka dei namar ka jingleit thaw sorkar lang ka HSPDP bad ka BJP ha ka jylla kaba u la ieng skhem ba tang ki seng riewlum bad ka NPP ki la lah ban thaw sorkar hi khlem da shim ia ka BJP. U bah Ardent ha kine ki sngi u la leit ban ialap elekshon na ka bynta ki kyrtong ka seng Congress bad u la kam ba haduh mynta um pat rung hapoh ka seng Congress.