Phah tohkit ka sorkar jylla, halor ka jingioh jingbit ki 41 ngut ban leit sha ka jingiathoh shong kurim ka ha Guwahati

Shillong: U Symbud myntri rangbah ka jylla mynta ka sngi, u la iathuh ba ha ka jingialang kaba la long mynta ka sngi ka sorkar jylla, ka la shim ia ka rai ban phah tohkit halor ka jingioh jingbit jong ki 41 ngut ki briew kiba sah ha Shillong ban leit ban shim bynta ha ka jingiathoh shong kurim kaba la long ha Greenwood Resort,Guwahati.

Kane ka long ba haduh 41 ngut ki briew kiba sah ha Shillong, ki la leit ban shim bynta ha ka jingiathoh shong kurim kaba la long ha Greenwood Resort ka ba don ha Guwahati ha ka 27 tarik u jylliew 2020 bad na kine ki 41 ngut, ki don 2 ngut kiba ioh ia ka jingpang Covid-19, katba 39 ngut ki long negative; hynrei ia kine ki 39 ngut ki briew, yn hap ban leh biang ia ka RT-PCR test hadien katto katne sngi ban pyntikna ba kine ki briew ki khlem shah ktah ha ka jingpang Covid-19.

Ha ba iakren bad ki lad pathai khubor u Bah Prestone, u iathuh ba ka sorkar jylla, ka la phah ban tohkit na ki Deputy Commissioner jong ka East Khasi Hills District bad ka Ribhoi Distict ba kumno kine ki 41 ngut ki briew, kiba sah ha shillong ki ioh jingbit ban leit ban shim bynta ha kane ka jingiathoh shong kurim ha Guwahati.

Na ka liang u bah Prestone u la iathuh ba lada lap ba ka don kano kano ka jingduna na ka liang ki ophisar ne na ka liang kine ki briew, kiba la leit ban shim bynta ha kane ka jingiathoh shong kurim kin ym lait na ka ain, namar ba ki la pynkhein ia ki hukum jong ka sorkar ba kim pat shah ia ka jingiarung iamih hapdeng ka jylla.

U bah Prestone u la iathuh ruh ba la ai jingbit tang ia ki 5 ngut ki briew, ba kin leit ban shim bynta ha kane ka jingiathoh shong kurim, hynrei haduh 41 ngut ki la leit ban shim bynta bad u la ong kane ka donkam ban tohkit bha ba ki ioh jingbit nangno ban leit sha Guwahati haduh 41 ngut.

U bah Prestone u la iathuh ba hadien ba ki la wan na ka ne ka jingiathoh shong kurim ki la pynlong ka jingkhawai ka ba rit ha Nongbah Shillong, kumta na ka liang u bah Prestone u la kyrpad na ki paidbah ba lada don mano mano ba ia kynduh ia kine ki briew kin Phone ha u number 108 ban iarap ia ka sorkar ban teh lakam ia ka jingsaphriang kane ka khlam Covid-19 ha ka ne ka jylla.