Phah tohkit ka DC jong ka South West, halor ka khubor bthei ka top Uranium

Shillong: Ka Deputy Commissioner jong ka South West Khasi Hills District ka kong C.Kharkongngor, myn hynnin ka sngi ka la iathuh ba halor ki khubor ba ka don ka jingbthei ka jaka buh ia u Uranium, ka la phah ban leit tohkit ia briew jong ka sorkar bad ia ki pulit sha katei ka jaka.

Haba ia kren bad ki lad pathai khubor na ka liang ka kong C Kharkongngor ka la ong “Nga la phah ia ki pulit bad ia ki team ban leit tohkit sha katei ka jaka hynrei namar ba ka surok ka long ka ba sniew bad ka ba jngai kum ta nga dang ap ia ka kaiphot.” Ka la iathuh ruh ba ka la tohkit ruh na ki nongshong shnong katei ka thain ha ka ba ki la iathuh na ka liang jong ki nongshong shnong ka Jynrin, ruh kim shym la ioh sngew ba don eiei kum kata”. Ka la iathuh ruh ba ka la dep ban iakren bad u AMD na Shillong ha ka ba u la iathuh ba haduh mynta ha katei ka jaka ym don ba pyntrei bad ki jaka hangto la khangdam lut, hnrei haduh mynta ym pat lah ban iathuh tikna ba ka don ne em ka jingbthei ka tanki buh Uranium, namar ba dang ap ia ka kaiphot.