Shillong: Hadien ba u Myntri ka Sorkar Assam u Pijush Hazarika u la ioh ia ka jingpang Covid-19 ha ka 6 tarik u bnai Kyllalyngkot 2022, hynrei u Bah Prestone Tynsong u ba dei u Symbud Myntri Rangbah ka jylla u khlem iabit satia ia katei ka jingpang wat hadien ba utei u Myntri ka Sorkar Assam u la iakynduh markhmat ia u Myntri Rangbah ka jylla Meghalaya u Conrad K Sangma bad kumjuh ruh ia u Bah Prestone Tynsong ha ka jingialang pynbeit khappud kaba la long ha kine ki khyndiat sngi kiba la dep noh.
Haba kren sha ki lad pathai khubor, u Bah Prestone Tynsong u la ong, “Nga la dep ban phah test bad nga ioh negative bad ki test kiba nga dang shu dep ban phah test kim duna ia ka 31 ne 32 sien. Ngi dei ki briew kiba hap ban kitkhlieh bha la ka long hapoh jong ka Secretariat ne shabar jong ka Secretariat bad haba nga ong ia kata ka mut ba lada don napdeng jong ngi kiba ioh positive kata ka jingsaphriang kan long kylleng kylleng bad haba ka la saphriang pat ngi la hap ban shim da ki lad ki lynti kumno ban leh”. U Bah Prestone Tynsong u la iathuh ruh ba kito kiba la iakynduh ia utei u Myntri ka Assam ha katei ka sngi iapynbeit khappud ki la ioh negative suda baroh.
Kata ka mut ba u Covid-19 um dei u khniang jingpang baiabit kumba ba batai na ki heh nongialam bad tnat ka koit ka khiah, te balei pat pyrkhing ia ka iaid ka ieng ki paidbah bad pynjari korphiw mynmiet-mynmiet. Balei ka Don kaei-re-kaei sha lyndet mo.