Phah shithi ka seng UDP sha ka ECI, halor ka jing pyndonkam bakla bad kam trai ki katto katne ki MLA ia ka skhim Focus bad Focus+

Shillong: Ka seng United democratic party (UDP), ka la phah da ka shithi sha u Chief Election Commissioner jong ka Election Commission jong ka ri India, halor ka jing pyndonkam bakla jong ki katto katne ki myntri sorkar,ki MLA kiba dei na ka parti national people party (NPP), wat kito ki MLA ki bym pat dei ki dkhot ba pura jong katei ka parti ruh.

Ha ka shithi ba la phah sha u Chief Election Commissioner jong ka ECI da u Vice President jong ka parti, u bah Allantry F Dkhar, ula ong ba lyngba ki khubor bad ki jingioh lum jingtip ka la don ka jing pyndonkam bakla ia ka skhim jong ka sorkar jylla ka ba latip da ka FOCUS bad FOCUS+, da ki katto katne ki myntri sorkar,ki MLA jong ka parti NPP bad kito ki MLA ba don ka jing thmu pyniasoh noh ialade sha ka parti National People Party, wat la kane ka skhim ka dei beit shibynta kaba la mang kyrpang tang na ka bynta ka jing myntoi jong kito ki nongrep jong ka jylla, ba kin nang lah shuh ban pynmih ia ki mar rep ki jong ki ban pynsuk ruh ia ki ban pynpoi sha ki iew ki hat.

Haba batai shaphang katei ka skhim ba la pyllait paidbah da ka sorkar jylla ha ka jing mang pisa ba 200 klur tyngka, ka jing pyllait ia kane ka skhim ka dei ban ai jing iarap ia ki nongrep jong ka jylla, hadien ka jing shah ktah ka jong ki na ka jing khang dam ha ki por jong ka khlam kovid-19.

Kane ka skhim la iohi ruh ia ka jingleit jngoh u myntri rangbah jong ka jylla, u Conrad Kongkal Sangma, ban ai ia ka jingiarap sha ki paidbah, kaba la mang 5000 tyngka sha man la u wei pa u wei u nongioh jingmyntoi, ha kaba katkum ka jing iathuh jong u myntri rangbah, kane ka pisa hi la ai kum shibynta ba ki nongrep kin ioh thied symbai.

Haba peit bniah ia ka jingai bad sam ia kane ka skhim da kito ki myntri sorkar,ki MLA na ka parti NPP, la iohi shai ba wat ha ki jaka sor, ba ka thung ka tep bad ka rep ka riang kam don ruh, katba ia ka skhim pat la pyniaid beit shakhmat. Kane hi ka pyn paw shai ia ka jing pyndonkam bakla na bynta ka jing ioh nong haka saiñ hima sima, ban pyndonkam bakla ha ka kyrteng jong ki nongrep. “Ngi shaniah skhem ha ka jingbishar bad ka jing khmih jong ka tnat khnamg ba ki nongrep kin ym duh noh ia la ka bhah ba ki dei ban ioh” la pynkut ka kyrwoh.