Shillong, 17 Jylliew:
Ka District Council Affairs (DCA) ka sorkar jylla ka la phah ia ka Village Administra tion Bill ka KHADC, 2015 sha ka tnad ain ba kan pule bniah ia ki kyndon jong kane ka ain hadien ba ka la shah kyntait ha u Lat ka jylla u V Shanmuganathan.
Ka thymmei khubor ka la iathuh ba ka tnad kam ain ka jylla ka dang eksamin ia kane ka VAB halor ki jingpan jingshai jong u Lat ka jylla.
“Ia kane ka VAB yn sa phah biang sha u Lat hadien ba la bishar bniah da ka tnad ain ka sorkar jylla” la ong ka khubor na u heh sorkar.
U heh na ka tnad DCA u la iathuh ba ki don ki jingpan jingshai kiba rit baria jong u Lat halor ka VAB.
U la kyntait ba u Lat u pan jingshai ia ki kyndon ba la weng noh da ka PDF ka sub section 8 bad 16 ka Section 5 jong kane ka Bill, kiba pyrshah jur da ka ARPA.
Shwa ia kane, la iathuh ba u Lat ka jylla u la pan jingshai na ka sorkar jylla halor ki kyndon ba la weng noh na ka VAB.
Ka ARPA bad ki sengbhalang ki la dawa ba dei ban pynneh ia kine ki kyndon namar ba ka jingweng noh ka long ka jingpyniap ia ka mynsiem jong kane ka Bill. Katkum ka khubor, u Lat u kwah ban tip la kine ki kyndon ba la weng ka PDF ki don jingtyngkhuh ne em bad ki hok tynrai katkum ba la bsuh ha ka Article 19 ka riti synshar ka ri India.
Ka sorkar jylla ka la ong ba ka sub section 5 bad 16 ka Section 8 ka iaid pyrsha ia ka riti synshar ka ri.
Ka Sub section 8 ka ong ba uno uno bym dei Khasi u dei ban sah ym duna ia ka 14 snem ban lah ban ai syrnod kata ruh lada u pynbiang ia ki jingdonkam katkum ba dei.
Ka Sub section 16 ka ong ba ka Executive Committee na ka por sha ka por ka lah ban pynmih ia ka jingpynbna halor ka jingmih jingrung jong ki briew bym dei ki Khasi ha ki shnong.
Phi don ban ong eiei?