Phah phikir ka sorkar na ka jingkhie u jumai

Shillong 07, K’lyngkot:
Namar ka jingkhie u jumai khah khah khamtam ka jingwan uba heh bha ha kane ka sngi, na ka lian u Myntri Rangbah u Dr. Mukul Sangma u laong ba u la khot ia baroh ki ophisar ba ki dei ban khot ia ka jingialang bad ki paidbah, ki tnad sorkar ban iakren ban pynkhreh kumno ban iada.
“Shwa ban wan u jumai dang shen, ngi la dep pynlong ia ki jingiathir kumno ban iada haba jia kum kane ka bor jong ka mariang ban lait na ka jingduh bad ka jingjulor kaba jur khamtam ba kane ka thain shatei mihngi ka India ka dei kaba ju tip kum ka jaka iaid jong u jumai”, la ong u Mukul.
“Ngi la pynlong bad iakren ha man ki bynta halor kane naduh ki bor district bad la pynlong ruh bun ki jingpyni kumno ban iada” la ong u Mukulbad bynrap “mynta kaba donkam shuh shuh ka long ban ai ia ka jinghikai bad ka jingpynshai sha ki paidbah halor kane.
“Ngi la iakren ia ki briew kiba dei ban shim ia kane ka bynta, kum ki hospital, DC ophis, Police ba kin pynkhreh kumno ban iada na ka bor jong ka mariang lada kan wan’, u la ong.
“Ngi la iohi ha ka 12 tarik Jylliew 1897 ia kane ka jingjia ha kaba u jumai bah ba heh u la wan khie ha kane ka ri kaba la wanrah shibun bah ka jingduh bad ka jingjulor”, u la ong.