Phah phikir ka Balang Katholik, ioh ngat ha ka mane ksuid

Shillong, 15 Jymmang:
Ka jingmih ka jing mane ksuid ha kine ki sngi ka la pynkyndit lut ia baroh ki briew ha kane ka jylla khamtam ia ka kynhun jong ki Balang bapher bapher.
Haba iakren bad u Archbishop  Dominic Jala u la ong ba ka jingmih jong kine ki kynhun mane ksuid ka la ialam bakla khamtam ia ki khynnah samla jong ka Balang.
La  ong ba na ka liang jong ka Balang ka la phah ia ki kmie ki kpa ba kin phikir bha ia la ki khun ki kti bad dei ban buddien ia ki kam ba ki leh. kham tam kito ki kmie ki kpa kiba phah shongwai ia ki khun samla hangne ka sor Shillong.
“Kane ka jingmane ksuid kadei ba iaid lang ryngkat bad ka jingdih pynbuiad kaba wanrah ia ka jingsniew”, la ong u Archbishop. La iathuh ba kane ka kynhun jingmane ksuid ka la sdang ban mih nyngkong na Nagaland ha kaba la don ka jingkular ba kito kiba mane ksuid ki lah ban ioh lut ia kaei kaba ki kwah kum ka spah ka kyrdan bad la pynthame da kaba rung ne ngeit ha kane ka jingmane kan pynioh lut ia ki jingkwah ne jingangnud jongki. Kane ka jingkwah ka ialam bakla iaki sha ka jingsniew, la ong u Archbishop.
Kane ka kynhun jingmane ksuid ka ialam bakla ia ki khun samla khamtam ia kito ki briew kiba la kulmar ka jingim, kiba kwah ban ioh ia kiei kiei da ka lynti kaba suk kum ka spah, ka jingpas ia ki eksamin bad kiwei.
Na ka liang jong u Archbishop la ong ba kum ka Balang ki donkam ban iarap ia ki iing ki sem jong ki para ba ngeit da kaba leit ban ia syllok sha ki.