Phah mih ka Khap Panchayat ia ki samla NE na Munirta

Shillong, 17 Rymphang:
Ka Khap Panchayat na Munirta kaba don ha South Delhi ka la phah mih noh ia baroh ki briew kiba dei na North East kiba sah ha katei ka thain. Haba pyntip halor kane, u President ka KSU Delhi u bah S Kharlyngdoh u la iathuh ba ia kane ka jingtip la ioh hynne ka sngi Nyngkong hi.
Na ka liang u Bah Kharlyngdoh u la ong ba ki briew na kane ka thain kiba sah ha katei ka thain, kim dei ban tieng hynrei ki dei ban long husiar.
“Ki pulit ki la pahara bha ha katei ka jaka hadien ba la ioh jingtip ia kane”, la iathuh u Bah Kharlyng doh lyngba ka phune na Delhi.
U la ong ba lada don kano kano ka jingjia, ki briew ba dei na thain North East ki dei ban pyntip mar mar ha u number 1093 ba la buh khnang ka sorkar ia ki briew ba dei na North East.
“Kito kiba dei na jylla Meghalaya ki lah ban pyntip ha Meghalaya House ne ha ophis ka seng ne ha ki number 08375072856, 09582520301″, la ong u bah Kharlyngdoh.
Ha kajuh ka por u la ong ba ka seng kan leit ban iashim bynta ha ka committee ba la khot ka sorkar na ka bynta ban iakren ia ka jingshngain jong ki briew na kane ka thain North East ban long ha ka sngi Balang.