Phah khang ka sorkar, ia ka Bethany Hospital

Shillong: Ka khubor jong ka Doordarshan Shillong, ka iathuh ba U Chief Secretary, ka sorkar Jylla, ula phah khang noh ia ka Bethany Hospital, Shillong naduh hynnin ka sngi hi, na ka daw jong ka jingdon u doktor, uba ioh ia katei ka jingpang Corona, na katei ka hospital.

Hynnin ka sngi, u bah Prestone Tynsong myntri rangbah ba ar, u la ong ba la don uwei u doctor jong ka Bethany Hospital u ba la ngat ia ka jing pang ‘corona virus’ bad mynta ia u la rah noh sha NEIGRIHMS na ka bynta ban ioh jing sumar.
“Nga kyntu ia baroh ki paidbah ka jylla ban buh ha ka jing duwai na ka bynta u doctor bad ka jylla baroh kawei na ka bynta ban lait noh na ka jing pang corona virus” la bynrap u bah Prestone Tynsong.
U bah Prestone Tynsong u la ong ruh ba ki paidbah ka jylla khamtam hapoh ka nongbah Shillong kim dei ban mih na ki ing ha ka 14 tarik iaiong naduh 6 baje mynstep kum shi bynta ban iada na ka jing pang ‘corona virus’ bad ban ailad ia ka briew ka tnat ka koit ka khiah ka jylla ban leh ia ka ba donkam.

Na ka liang u myntri rangbah ka jylla u Conrad K Sangma u la ong ba ka sorkar nalor ba ka la khang khyrdep (seal) ia ka hospital ka la pynkhreh ruh ban tehlakam ia ka jing saphriang ka jing pang ‘corona virus’ hapoh ka jylla.
U myntri rangbah u la kyntu ruh ia ki paidbah ka jylla khamtam hapoh ka nongbah Shillong ba kim dei ban don ha ka jing tieng hynrei kidei ban bud ia ka jing btah ka tnat ka koit ka khiah bad u la kyntu ruh ia baroh ki briew kiba la wan teng hapoh ka hospital ban pyntip sha ki bor sorkar na ka ban leh ia ka ba donkam.

Ki lad khubor ki iathuh ba utei u doktor, um shym leit jingleit satia ialade, hynrei u pyrsa kurim jongu, u dang shu wan phai na New York, ha ka 22tarik Lber 2020.