|
Shillong: Ka sorkar pdeng ka la phah ia ki 21 ngut ki stad ka National Disaster Response Force (NDRF) ban wad ia ki briew ba la shah tep ha krem dewiong ha Ryngksan ka East Jaintia Hills, kaba la iaid sha ka 15 sngi kynthih mynta khlem pat lapdien ia ki.
Mynta ka sngi, ki briew jong ka NDRF na Odisha hapoh ka jingialam u Sukanta Sethi ki la wan kiew da ka liengsuin shipai Indian Air Force (IAF) ryngkat 10 tylli ki pump um kiba khlain bor khnang ban tan ia ka um napoh krem. Ki liengsuin ki la kit ia kine ki tiar haduh Guwahati bad nangtei, kin sa kit pat ki kali sha ka jaka ba jia ha East Jaintia Hills ban tan ia ki um na ka krem ba shah tep ki briew. Dang shen, u Symbud Myntri Rangbah ka jylla, u Bah Prestone Tynsong u la ong ba ka sorkar ka dang bteng ka jingpyrshang ban sei ia ki briew kiba la shah tep ha katei ka krem dewiong, u la pynpaw ruh ia ka ka kynhuh ngam um na ka National Disaster Response Force (NDRF) ki shem jingeh ban pynrngat ia katei ka krem khamtam namar ha kine ki sngi ba la dep ka la don ka jinghap slap. La iathuh ruh ba u la ioh jingtip ba u lum ba la khlong ia u dewiong u don ia ka jingheh kumba 3 sq km, kaba mut ba ka jingtih ia utei u lum ruh ka la bun, hynrei u la pynpaw ka jingkyrmen ban lah pynrngat ia ka um khnang ban ioh sei noh ia ki briew kiba lamshah tep haktei ka krem, namar ba ka dei ka por tlang. Haduh mynta ki bor sorkar ki dang sah ha ka umdum namar ba ia ki met jong ki briew ba la shah tep, ym pat lap satia haduh kine ki sngi. Ka sorkar jylla ka la kut bor ban wad ia ki briew ba shah tep bad ka jingwan iarap jong ki briew na ka NDRF ka kyrmen ban lah ban ioh sei ia ki met. Kumba 13 ngut ki briew ki la suba shah tep im hapoh krem dewiong hadien ba la shlei kynsan ka um hapoh krem kaba jrong kumba 300 metre eiei ba ki rung ban tih dewiong ha ka jaka kaba khot ka Ryngksan ha ka shnong Lumthari, ka East Jaintia Hills ha ka 13 tarik mynta u bnai. |
