Phah jingthoh ka FKJGP bad Synjuk ki Rangbah shnong halor ka jingbym ioh Screening ia ki briew sharum ka Byrnihat

Nongpoh: Ki nongialam ka FKJGP ha Ri Bhoi, ha ryngkat ki nongialam ka Synjuk ki Rangbah Shnong Byrnihat Area, hynnin ka sngi ki la leit ban buh jingthoh sha ka Deputy Commissioner ka Ri Bhoi, kaba dei ruh ka jingthoh kaba ki la pynpaw ia ka jingsngewkhia halor ka jingbym don ki lad pyrkhing ban iada ia ka jingwan rung ki bar jylla, kiba la wan na kiwei ki jylla shapoh ka thain Byrnihat.

Halor katei ka jingthoh kaba ki la phah sha ka DC, na ka liang kitei ki nongialam ka FKJGP bad Synjuk ki Rangbah Shnong ka Byrnihat Area, ki la pynpaw ba katei ka thain ba ka don hapdeng ka jingma, namar ka ki briew kiba wan na ki jaka bapher bapher ki ioh ban leit sha katei ka thain, khlem da shah peit khmieh ha ki briew kiba deipeit kiba ap ha Byrnihat. Haba kdew halor ka jingioh ban iaid laitluid ki briew nabar, kitei ki nongialam ka FKJGP bad Synjuk ki Rangbah shnong, ki la pynpaw ba ki dang don bun ki jaka kiba don ha katei ka thain, kaba ki briew kiba nabar ki ioh ban rung da kaba laitluid, kata naduh na Byrnihat sharum shaduh ki thain Pillingkata, Killing, Maikhuli lem bad kiwei dei ki thain kiba don marjan. Haba kren sha ki Lad Pathaikhubor, u Bah Lumlang Mawnai, Vice President ka FKJGP ha Ri Bhoi bad u Bah Anothonyio Syiem, Secretary ka Synjuk ki Rangbah Shnong Byrnihat Area, ki la pynpaw, ba ka jingdon jong katei ka jaka ban peit khmieh ia ka koit ka khiah ki nongleit nongwan khamtam kito kiba thmu ban rung shapoh ka jylla Meghalaya, kaba la pynieng hapoh ka Infiltration Check Gate, ka la biang eh, hynrei ha kawei pat ka liang ka buh jingma pat ia kiwei kiwei ki shnong kiba don ha ka thain Byrnihat bad ki bym donkam ban iaid lyngba katei ka jaka kaba la buh kyrpang. Ki la ong ruh, ba ki dang don bun phew tylli ki shnong kiba don sharum na Byrnihat shaduh Khanapara, hynrei ia kitei ki briew kiba wan na ki jaka bapher bapher ym shem la don kino kino ki jingshah peit khmieh ha ki briew jong ka koit ka khiah bad katei hi ka buh jingma ia ki briew kiba sah ha kitei ki shnong.

Namarkata, haba iadei bad katei ka jingbym don ki jaka ban peit ia ki briew nabar kiba wan rung sha katei ka thain, na ka liang ka FKJGP bad ki bor ka Synjuk ki Rangbah Shnong ka Byrnihat Area, ki la kyrpad na ka DC kaba peit ba khmieh ia ka district ba kan pynkynriah noh ia katei ka jaka Screening ia ki paidbah nongleit nongwan ha ki bynta ba kham sharum bad lada lah ha ki thain Jerobad, khnang ba katei ka jingpeit khmieh kan long solonsar bad ba kan long ruh ka jingshngain ia ki paidbah hapoh ka jylla hi baroh kawei.