Phah dorkhas ka HITO, halor ka jingteh kyndon U DC, ha ka sngi niew vote

Shillong:Ka Seng Hynñiewtrep Integrated Teritorial Organisation (HITO), ka la phah shithi sha u Deputy Commissioner jong ka East Khasi Hills haba iadei bad ka jingpynmih hukum lyngba ka memo No.SHEL.V/MP/70/2024/PT-III/90-A dated 23-05-2024.

Ha ka shithi ba la phah sha u tei u heh jong ka district, ka seng ka la thoh ba katkum ka hukum ba ka ophis treikam jongu, ka la dep ban pynmih ha ka 23tarik Jymmang 2024 ban pyntreikam ia ka Section 144 CrPC ha baroh ki bynta jong ka East Khasi Hills District jong ka jylla Meghalaya naduh ka 23 tarik jymmang 2024 haduh ka 06/06/2024,namar ka jingñiew ia ka vote jong ka elekshon Lok sabha.

Ha ka hukum ba la pynmih ha ka 23/05/24, ka ophis treikam jong U DC Shillong, ka la thoh ba yn ym shah ia ka jingiaid ralli, ki jingiaid paidbah da ki kyrtong kiba jop, hadien bala dep ban pynbna ia ka resol ha ki bynta jong ka East Khasi Hills District bad ka seng, ka ong ba kane ka long pyrshah ia ka hok jong manla u wei pa u wei u nong shong shnong, katkum ka article 14 bad 19 jong ka Fundamental Right ba la thoh ha ka riti synshar jong ka ri bad ka jinglong laitluid jong ki nong shong shnong.

Ka Ïingbishar jong ka supreme court ka pynpaw ba kum kine ki jingpynmih hukum haba iadei bad ka kyndon 144 CrPC na ka ophis treikam jong U DC, ka long ka bym iahap satia.

Ka hukum ba la pynmih ha ka 23/05/2024 la pynbna ban khang pyrshah ia ki jingiaid ralli, proseshon bad kiwei kiwei pat ha baroh kawei ka district khlem da don satia ki daw kiba biang, ka jingwanrah ia kane ka hukum khem da ia phylliew jingmut bad ki kynhun kiba don bynta ka pynlong ia ki paidbah ba bun ba kin shah khñiot khlem ki daw ba biang.

Kum shibynta,ban lehkmen, ki kynhun,ki paidbah nong shong shnong da kaba pynlong ia ki ralli ka long ban pynpaw ia ka jingkmen haba iadei bad ka jingpynbna ia ka resol jong ka elekshon khlem da pynkheiñ ia ki kyndon aiñ ne pynmih kino kino ki jingkulmar.

Kumta haba iadei bad kane la kyrpad ia ka ophis treikam jong u DC, ba kan pynshong nongrim bad peit bniah biang lane ban weng noh ia ka hukum ba la pynmih ha ka 23tarik Jymmang 2024 khnang ba ka hok jong ki nong shong shnong kan ym shah pynduh.