Phah beit beit ia ka kyrteng U Conrad sha ophis U Lat

Shillong, 18 Risaw:
U Purno Agitok Sangma, ula pyni biang, ia la ka jong ka jingproh jabieng jongu, ha ka sain pyrthei jong ka Jylla bad kata ka long ba ula phah beit beit ia ka kyrteng jong u khun jongu, U Conrad Sangma, ba un mynjur, kum u MDC ban shu mon hi da U Lat ka Jylla.
Ki nongialam ka NPP, kiba don mynta ha ka kynhun synrop jong ka ha GHADC kaba la tip kum ka Garo Hills Progressive Alliance (GHPA), ki iathuh ba ki la phah beit beit ia ka kyrteng u Conrad Sangma kum u MDC shu sieh sha u Lat ka jylla bad ka khlem iaid lyngba ka tnad District Council Affairs ka sorkar jylla.
Haba ia kren bad u nong thoh khubor ka NPP ka la ong ba ka la phah ia ka kyrteng u Conrad sha u Lat ka jylla ha ka 16 tarik mynta u bnai bad ka la ong ba shen ha kine ki ar sngi u Lat un ai ia ka jingmynjur jong u, ia u Conrad kum u MDC shu sieh naba ka jingsoi jong ki, ka pyni ba ki la don ha ka jingbunpaid ha GHADC.
Hynrei haba ia kren bad ki riew shemphang kiba tip ia ka Aiñ ki la ong ba lah ban phah beit ia ka kyrteng jong u MDC shu sieh sha u Lat ka jylla khlem da iaid lyngba ka tnad DCA, bad ki la ong ba ka DCA, ka dei tang ka jingiaid lynti kaba hap ban shu pyndep rukom, hynrei ia ka bor ban mynjur ia ka kyrteng u MDC ka shong ha ka bor jong u Lat bad lada u sngewhun, lane ha kaba ki ong ha ka ktien nongwei at the pleasure of the Governor u lah ban ai jingmynjur ia ka kyrteng jong u MDC shu sieh.
Haba ia kren bad ki nongialam ka NPP la sngewthuh ba ki la don ka jingthikna ba u Lat shen un mynjur noh ia ka kyrteng jong u Conrad shuwa ka elekshon jied CEM ha GHADC ha kaba ki la pynthikna ruh ba u Conrad un jop suk ha katei ka elekshon bad un dei ma u ban shimti beit ia ka shuki CEM. Lah ban kdew ba katei ka jingjia ha GHADC kan lah ruh ban dei ka jingjia ka ban sah kynmaw ha ki District Council kane ka jylla ha kaba u MDC shu sieh un ioh syndon ban shong ha ka shuki CEM.