Per ki dohkha ha Umtrew Byrnihat, muja ki paidbah ban leit tong doh

Nongpoh: La ioh jingtip ba mynta ka sngi, ki la don shibun ngut ki paidbah kiba la muja eh ban leit tong ia ki dohkha kiba la per hapoh ka Wah Umtrew ha Byrnihat bad la ong ruh ba ki la don shibun ki briew kiba la ioh shibun ki dohkha lem bad kiwei de ki jait doh kiba don hapoh katei ka Wah.

Na ka jingiathuh jong kito ki briew kiba la leit ban tong ia kitei ki doh kiba la per ha katei ka Wah, la ong ba ha kaba nyngkong, ki la iohi ia shibun ki dohkha lem bad kiwei ki jait doh, kiba la per ha sla jong katei ka Wah, kumta haba la iohi ba kitei ki doh ki la per ha sla um, kitei ki briew ki la leit ban kem bad leit tong ia kitei ki dohkha.
Kham hadien haba la tip paidbah halor ka jingper ki dohkha ha sla jong katei ka Wah ha Byrnihat, la nangmih shibun ki briew bad kiba la sei la ki jong ki jong ki tiar ban kem dohkha, ha kaba bun na kitei ki briew ki la ioh shibun ki dohkha lem bad kiwei de ki jait doh kiba im ha um.

Ka tyllong khubor, la iathuh ruh ba kitei ki briew kiba la leit ban kem bad tong ia kitei ki doh kiba la per ha sla jong katei ka Wah, ki la rah beit ia ki sha iing ban bam ia ki bad kim tip satia la kitei ki dohkha kiba per ha sla jong katei ka Wah ki long ne em kiba bit ban bam.
Ia ka daw jong ka jingper kitei ki dohkha ha sla jong katei ka Wah ym pat lah ban tip, la ka dei na ka jingber dawai bih ki riew shim kabu ne na kiwei de ki daw.