Per da ki hajar, ki dohkha ha wah Umtrew

Nongpoh, 15 Jymmang: Da ki hajar tylli ki dohkha ki la iap bad shu per kai ha sla um jong ka Wah Umtrew naduh 15 Mer ter ter shaduh Tandu, Assam bad kane ka jingiap jong ki dohkha ha katei ka wah la suba ba dei na ka daw jong ka jingpyntuid jakhlia da ki kharkhana kiba don ha ki thain Byrnihat, Ri Bhoi District.
Ki nongialam jong ka Garo Student Union (GSU), Byrnihat, hadien ba ki la ioh ia ka jingujor halor ka jingiap bad per jong ki dohkha ha katei ka wah, kumta ki la pynlong ia ka jinghiar jurip ha ka sngi saitjain ba ladep, ha kaba ki la lap shisha ia ki hajar tylli ki dohkha ki la shu per ha sla um jong ka wah Umtrew.
Ha kaba iadei bad kane ka jingiap jong ki dohkha ha katei ka wah Umtrew, na ka liang u Sonny R. Marak, president GSU, u la ong ba kane ka jingiap jong ki dohkha kadei namar ba katei ka wah ka la kylla bih na ka daw jong ka jingpyntuid ia ki kynja ba long bih da ki karkhana kiba don ha katei ka thain Byrnihat.
Bun na ki paidbah kiba sah ha ki khappud jong ka Meghalaya-Assam, ki tam ia kine ki dohkha kiba la iap ha katei ka wah bad ia kine kiba ki la tam na katei ka wah, ki leit ban die sha ki iew ki hat, kaba wanrah ia ka jingma ia ki briew kiba thied ia kiba kum kitei ki jait dohkha.
U la ong ruh, baroh ki karkhana kiba don ha ki thain Byrnihat, ki pyntuid ia baroh kiba mih na ki karkhana sha ka wah Umtrei bad lyngba jong kane ka jingpyntuid ia ki jakhlia sha katei ka wah, kan ym pyniap tang ia ki dohkha kiba don ha katei ka wah, hynrei ka wanrah ruh ia ka jingma na ka byta jong ki paidbah kiba don ha katei ka thain, namar bun na ki paidbah ki dang shanniah ia katei ka wan ha ki jingpyndonkam ban man ka sngi.
Ka seng ka dap da ka jingsngewkhia kaba jur halor ka jingbun jong ki karkhana kiba pyntuid ia baroh ki jakhlia na ki karkhana sha katei ka wah Umtrew, namar lyngba jong kane ka jingpyntuid na na ki karkhana sha ki wah, kan wanrah ruh ia ka jingma kaba khraw hadien habud.
Kumta halor jong katei ka jingiap jong ki dohkha ha katei ka wah Umtrew, na ka liang ka GSU, ka la dawa na ka sorkar Megalaya bad Assam lyngba ka tnat Pollution Board, ba kin pynlong ia ka jingleit ban jurip bad ban lap ia ka daw jong ka jingiap ei ki dohkha ha katei ka wah.