Pep U CEM ka JHADC ha iakynduh ki CEM

Shillong,3 Rymphang:
Mynta ka sngi ka dei ka sngi ba la pynbeit ba kan don ka jingiakynduh hapdeng ki lai CEM jong ki lai tylli ki District Council ha kane ka jylla kata ka KHADC, JHADC bad GHADC.Katei ka jingialang ka la long ha Conference Hall jong ka KHADC ban ia kren halor ka kyndon aiñ 128 kaba ia dei bad ka jingioh thep vote lane ioh ia khun elekshon ki bym dei riewlum ha District Council.
Ha katei ka jingialang u CEM ka JHADc u ma Thombor Shiwat um shym la poi bad ym don ba mihkhmat na ka JHADC, katba u CEM ka KHADC u bah Pynshngaiñ N Syiem bad u CEM ka GHADC u Denang T Sangma ryngkat u Deputy CEM u Augustine Marak ki la poi sha katei ka jingialang.
Haba ia kren bad ki nongthohkhubor hadien ba la wai katei ka jingialang u CEM ka KHADC u la ong ba la rai ban thaw ia ka komiti bad ban pan jingmut na ki riew shemphang kiba don jingtip ia ka riti synshar ka ri katkum ka 6th Schedule bad la bthah ia baroh ki Council ba ki dei ban buh ia la ki jong ki riew shemphang ban ia kren na bynta katei ka kam. Haduh mynta ym pat shym la ia kren eiei shaphang katei ka bynta ban wanrah jingpynkylla ne da kano kano ka lynti ban pynkylla ia katei ka kyndon 128.