Pep trei ki myntri, ba kyrshan HNLC

Shillong,
17 Rymphang:
Ka HNLC lyngba ka kyrwoh khubor kaba la phah da u publicity jong ka u bah Sainkupar Nong traw ka la kam ba ka jingbym poi trei ki myntri sorkar sha ki ophis treikam jong ki, dei ka dak ka jingkyrshan jong ki ia ka pakhang shnong 12 kyngta kaba ka la khot ha ka lah sngi u blei. Ka jingjop jong katei ka pakhang shnong ka pynshisha ba ki paidbah kane ka ri hynniewtrep ki kyrshan ia ka HNLC da kaba jar jar. Ka la ong ba ka jingkhot khot jong ka ia katei ka pakhang shnong ha ka lah sngi u blei ka dei ba ki paidbah nongrep kin ym ia kynduh jingeh, hynrei kin ioh por ban leit sha ki jaka rep jong ki ban lum ban lang ia ki mar-rep.
Halor katei ka jingjop ka pakhang shnong, wat ba ki pulit ruh ki la kam ba ka seng ka la troin, ka HNLC ka la kob ba ka la lah ban pyni ia katei ka jingjop ha ka thain kan don jingeh aiu pat lada ka ka pynjrong na kawei ka sngi sha kawei pat. Ha ka kyrwoh ka la ong ba ka sorkar India ka ialeh ban knieh noh ia ka hok longtrai jong ka jaitbynriew hynniewtrep, hynrei kan ym shongthait pat ban ia khun na ka bynta ban wanrah biang ia ka jingdon jingem kaba la shah knieh. Ka la ong ruh na bynta uwei pa uwei u Goliath u blei u la thaw ia u David, bad na bynta uwei pa uwei u Pharoah u la thaw ia u Moses. Ha katei ka kyrwoh ka la ong biang ba kaei kaba la jia ha KHADC, JHADC ia ki syiem, ki Rangbah shnong ka dei na ka daw ba ka jaitbynriew kam ioh ia ka synshar laitluid, na kata ka daw la sloit noh ia ka iktiar ki rangbah shnong, ka jingshah khang tih dewiong bad balei ym ithuh ia ka ktien khasi. Ka HNLC ka la ong ba kane ka dei ka jingnion bein.