Pep jingialang 6 ngut ki MDC ka ARPA, jah U bah Pyniaid rSwait briew biang ka Congress

Shillong,
12 Rymphang:
Mynta ka sngi ka la don ka jingialang Executive Committee ka Khasi Hills Autonomous District Council, ban pynkhreh lypa na bynta ka dorbar mang tyngka ka KHADC ka ban sdang ha ka 23 tarik mynta u bnai. Hadien ka EC ka la don pat sa ka jingialang jong ka ARPA bad ha katei ka jingialang la iohi ba ki don hynriew ngut ki dkhot jong ka ARPA ki bym poi jing ialang bad kitei ki long u bah Metbah Lyngdoh ka UDP, bah Brol Nongsiej ka UDP u bah K.P Pang niang ka HSPDP, u bah Morningstar Mawsor ka HSPDP, u bah Ardent Miller Basaiawmoit ka HSPDP, u bah Pyniaid S Syiem ka HSPDP.
U bah Adelbert Nongrum haba kren sha ki nongthohkhubor, hadien ba la wai katei ka jingialang u la ong ba baroh ki dkhot ka ARPA kiba pep jingialang ki la pyntip sha u bad ki la pyni la ki jong ki daw, don ba ki pep jingialang naba iap briew, don kiba pang ba shitom hynrei u la ong ba na baroh dei tang na u bah Pyniaid S Syiem ba u khlem ioh jingtip eiei.
Ki lad khubor ki la iathuh ba tang mar ia ioh jingtip ba ki don bun ngut ki dkhot ka ARPA kiba la pep jingialang , la ong ba na ka liang ka KHUDA kaba ialam da ka seng Congress, ka la sdang ban swait briew ban pyrshang ban wad biang ia ka nombar ban pynkhyllem noh ia ka EC ba mynta, namar ba ka la don lypa ka jingai ksai hi na ka liang ki dkhot ka ARPA ha kaba la paw ha ki khubor ba u bah Pyniaid S Syiem, u la byrthen ban pynkhyllem ia kane ka EC kaba mynta.
Katto katne ngut ki MDC na ka seng Congress ki la pynpaw ba ka nombar kaba ki wad mynta ban ioh ia ka bor synshar ka dei beit tang ban pynbiang ia ka 15 ngut bad lada ki ioh ia katei ka 15 ngut ki la thikna ba kin ioh ia ka bor synshar, namar ba la iathuh ba kin sa don ruh ki dkhot napoh ka ARPA kiba la dep suh buit lypa ba kin shu jah beit ha ka sngi ia pyni bor, namar ba kim lah ban pyni pyrshah ba kim kyrshan hynrei kin shu ai daw da kiwei pat ki kam ban pyni ba ki donkam kyrkieh. Ki lad khubor ki la iathuh ba ka seng Congress mynta ka dang pyrshang tyngeh ban ioh sa tang iwei ne ar ki MDC ka ARPA namarba kumba long mynta la ong ba ki la don ruh kiba ki la dep bat lypa ha kti bad ki ban shu wan beit ha ka por kaba biang.