Pep dorbar U Bah Blanding & U Equator, ba kim kwah ia synrop Congress:Shylla

Shillong, 23 Jylliew:
Halor ka jing kynnoh jong ki liang pyrshah ba u lamphang dorbar, u dei uba shah liang, U Bah HS Shylla MDC jong ka seng UDP, ula kynthoh mynta ka sngi, da kaba ong “Lada ki MDC UDP, HSPDP, Independent bad Congress, ki la dap 15ngut ha ka 22tarik Jylliew 2017, kin ym da la wad daw ia U Chairman bapli, kin jin da la ai khublei pynban ….. hynrei ban shu phah ieng ia ki MDC kiba kyrshan ia ka jing pyrshah CEM bad lada ki don 15ngut ne tam, ka EC jong U Bah PN Syiem ka la kyllon”.
U Bah Shylla, ula ong shuh shuh ba ki don ki MDC, kiba la leit sha iing jong ki arngut ki Executive Member jong U Bah PN Syiem, ha kaba ki la tyrwa da ka shuki CEM bad Deputy CEM, hynrei ki la hap ban leit phai tylli, namar ba kitei ki arngut kim treh ban ia treilang bad ka Congress bad kumta ki la shu sah hi tang 6 na ka Congress + 3 na ka UDP + 3 na ka HSPDP + 1 Independent lane 12ngut baroh. U Bah Shylla, u ong shuh shuh, ba ki arngut ki MDC, kiba pep dorbar, U Bah Blanding Warjri bad U bah Equator Nongrang, ki pep dorbar khnang, namar ba kim mon ban ia treilang bad ka Congress bad U bah Shylla, u ong shuh ba U Bah Adelbert Nongrum, ula iathuh ba wat la ula rai ban weng noh ia ka jingkyrshan ia ka PDF, hynrei um treh pat ban kyrshan ban pynhap shuki ia u Bah PN Syiem.
“Ka jingleit ba ujor sha u rangbah Congress, uba long u myntri DCA, ka long tang ka jing ai daw ban ioh da rapjot bym kot ka jingdon ki MDC sha ka 15ngut ban pynkhyllem ia ka Executive Committee jong ka PDF, ba la ialam da U bah PN Syiem” ong shuh U bah Shylla. La ong biang U bah Shylla, ba ka Rule 22 jong ka AD Rules 1951, ka thoh shai kdar ba ia ka jing ia tynjuh bor, dei ban mynjur (passed) da ka jing bun jong ki MDC ka District Council, kaba mut da ki 15 ngut ki MDC ha ka District Council kaba don 29 ngut ki MDC. Ia kane la pynshai kdar da ka rai jong ka Guwahati High Court ha u snem 1963 ha ka mokotduma U Bah Edwin Bareh, CEM vrs ia U Bah Henry Cotton ha kaba ka High Court kam pdiang ia ka jingpynkhyllem ia ka Executive Committee tang da ki 11 ngut ki MDC ha ka District Council kaba don tang 24 ngut ki MDC ha kata ka por.