Peit kai ka sorkar ia ka Sabuda: UDP

Shillong, 24 Naitung:
Ki samla ka UDP Shillong city ki la pynrem jur ia ka jinglong nong peitkai ka sorkar Congress ha kane ka jylla ia ka jingthombor ka Assam ban pynpra ia ka skul SSA ha shnong Sabuda kaba don ha Ri-Bhoi district.
“Ka long kaba sngew lyngngoh shisha balei ka Congress kaba ialam ia ka sorkar ka long nongpeitkai jar jar ia katei ka jingjia” la ong ka UDP Shillong city.
Ka Shillong city jong ki samla kaba iakynduh ha kane ka sngi Hatmajai ka la pynpaw ia ka jingsngew khia ia ka jingkiew ki kam runar ha kane ka jylla khamtam ia ki kynthei bad ki khynnah.
“Kane ka dei ka jingkdew ba ka sorkar kam don ka jingkitkhlieh. Ka jingshisha ka long ba ka kaiphod jong ka CBI halor ka jingthung ia ki nonghikai skul, ka jingjia ha ka CMJ University bad u Nurul Islam ki dang sah teng bad ka pyni ia ka jinglong ka sorkar” la ong ki samla ka UDP Shillong city.
Ka jingialang ka la iakren ruh ia ka jingkiew dor jong ka petrol, kaba ktah ia ka marbam mardih ha ka iew ha hat bad ktah kylla ia ki paidbah baduk ba jynjar.
Ka jingialang ka la kyrshan ruh ia ka jingpyrshah jongki sengbhalang ia ka jingthmu ban wanrah lynti rel sha kane ka jylla.
Ka jingialang ka la ai jingmut ia ka sorkar ban thaw noh da ka District Selection Committee, kumba long ka State Public Commission.
Ki samla ka UDP Shillong city ki la ong ba kane kan wanrah ka jingshaniah ia ki paidbah.
Ka jingialang ka la pan jingshai ruh na u Chief Secretary halor ka jinglong ki syrnod schedule tribe jong u Myntri Rsngbah Dr Mukul Sangma bad u paa jongu, u Zenith Sangma namar ba la mih ka jingkynnoh pyrshah ia ki kumba jia ia u nongialam barim ka Congress uba dei ruh u Myntri Rangbah u Ajit Jogi jong ka jylla Chattisgarh kaba la paw ha ki lad pathai khubor ba ktah ia ka jingmut jingpyrkhat jong ki paidbah.