Peit ka jingshlei um, ka jingtwa khyndew, tang namar ba phi ia bam doh, ong u heh ka IIT

New Delhi: U Laxmidhar Behera, U Director, ka IIT Mandi, ha ki khyndiat sngi ba ladep, ula ther tyngeh ia ki samla pule jong katei ka skul bah, kaba don ha Himachal Pradesh, da kaba u kynnoh, ba dei na ka jingiabam doh jong ki samla pule, ba sa jia ka jingshlei um kaba jur bad ka jingbthei jong u lyoh, kaba ju jia khah khah ha ka jylla Himachal Pradesh bad u la khot ia ki samla pule jong ka IIT Mandi, ba ki dei ban smai noh mardor, ba kim bit shuh ban bam doh nangne shakhmat.

“Ka Himachal Pradesh, kan nang mad ia ki jingjia ba khyllah, lada ngim sangeh ban pyniap ia ki mrad, kiba pli kiba lui lui, namar ba ka don ka jingiadei halor ka jingjot jong ka mariang, wat la phim iohi, da la ki jong ki khmat briew jongphi” ula ong shuh shuh.

“Kin don shibun ki jingtwa khyndew, ki jingbthei jong u lyoh bad sa kiwei ki jingjia ba sngewsih, tang na ka daw jong ka jingpyniap bein ia ki mrad bad ba ki briew, ki ia bam doh” ong Behera bad katei ka jingkren, ka la saphriang ha ka video, ha kiba bun ki rynsan social media.

“Ba phin long ki briew kiba bha, kaei kaba phi dei ban leh? Sangeh shisyndon ka jingbam doh” bad u sa khot ia ki samla, ba kin bam smai, ban nym bam doh shuh.