Pei thliew ka surok, kyllon kawei ka trok ha ka shnong Sakwang

Shillong: Namar ka jingjur eh jong u lapbah lapsan ha kine ki khyndiat sngi ka la pynlong ia kawei ka surok kaba dei iaid na Jakrem Sakwang ba kan pei thliew na ki bynta ba don u home pipe bad katei ka jingjia ka la jia ha ka 26 tarik u bnai Nailar 2021 bad ka la pynong ruh ia kawei ka trok ba kan kyllon harud ka surok hajan ki lyngkha kba.

Haba kren sha ki lad pathai khubor, u Bah Shining Kharjahrin u ba dei u Myntri jong ka shnong Sakwang u la iathuh ba katei ka jingjia ka la jia naduh ka step jong ka 26 tarik bad hadien kane ka jingjia u la ai jingtip noh mar mar ia katei ka jingjia sha ka ophis jong u Executive Engineer ka tnad PWD Roads Mawkyrwat Division khnang ba kin leh ia kaba donkam bad ba ki paidbah kin nym iakynduh jingeh ha ka iaid ka ieng lyngba ki kali. U Bah Shining Kharjahrin u la buh ruh ka jingkyrpad ia ka ophis ba kan sngewbha ban phah maramot noh kham kloi ia katei ka surok namar lada shu ieh kumto ioh ka wanrah ia ka jingjia mynsaw ne ka jingjia ba sngewsih jong ki kali kiba iaid ba ieng bad khamtam eh ha ka por mynmiet myniong. U la iathuh ruh ba na ka liang u Assistant Executive Engineer ka tnad PWD Roads Mawkyrwat Division, u Bah SI Laso, mar ia ioh jingtip u la wan ban jurip hi dalade ia katei ka surok. Ha ka 27 tarik u bnai Nailar 2021 lah iohi ba la sdang ban maramot noh mardor ia katei ka surok kaba la pei thliew.