U Pope Francis, ula pdiang hynnin ka sngi, ba ki don ki Lyngdoh niam katholik, kiba ju leh shait ia ki nuns kynthei ha kiba bun ki jaka trei kam jongki.
“Don ki Lyngdoh niam bad ki Bishop kiba leh ia kata” ong U Pope Francis, haba jubab ia ka jingkylli ki nongthoh khubor, ha ka por ba u wan phai na United Arab Emirates.
Kawei ka makasin, ka la thoh ha ki khyndiat sngi ba ladep, ba ki don bun ki nun, kiba hap ban pynhap khun lane ban long kmie noh, namar ba ki kpa jongki, kiba dei ki lyngdoh niam, kim shym la kam satia ia la ki khun ba ki la pynkha hi ma ki. Katei ka jingjia, ka la jia ruh, ha Kerala, ha kaba kawei ka nun na Kerala, ka la kynnoh ba ka shah bat bor ha U Bishop.
U Pope Francis, u iathuh ba katei ka jingjia, ka jia bha kylleng kylleng bad ka kham jur ha ki katto katne ki jaka bad ha ki jaka trei kam jongki. “Nga ngeit ba ka dang iai bteng haduh ha kine ki sngi, namar ba nga shim ba kam dei kaba suk ban shu iehnoh jyndat” ula ong. U iathuh ruh ba ki don bun ki nongialam jong ka Balang Katholik, kiba la shah beh kam bad ka balang, ka dang peit bniah ia katei ka kam.
Lah ban pynkynmaw ba U Bishop Franco Mulakkal ula shah kem, ha ka 21tarik Nailur 2018 halor ka jingshah kynnoh, ba u ju mlien ban bat bor ia kawei ka nun, haduh 13 sien kynthih hapdeng ki snem 2014 haduh 2016. U Pope Francis, ula sospon ia u, na ka kam kaba u bat bad U Mulakkal, 53, uba peit ia ka diocese ha Jalandhar kaba ha Punjab, ula kyntait ia katei ka jing kynnoh.