Pdiang sngewbha u Rakkam ban wan iuhkjat ka VPP sha Garo Hills

Shillong:U myntri ka tnad pule puthi ka jylla u Rakkam A Sangma ula pdiang sngewbha ia ka seng Voice of the People Party (VPP) ba kan leit pyniar thapniang sha rilum Garo.

Haba kren mynta ka sngi, u Rakkam ula ong ba ka VPP ka don ka lad ban wan iuhkjat sha rilum Garo hadien ba ka la jop ia ka elekshon MP dang shen na Shillong Parliamentary Constituency.
Hynrei ha kajuh ka por, ka shong pat ha u paidbah ban ai ia ka rai ban jied ia ki kyrtong kiba bit dor.

U Rakkam ula ong ba kan jingwan ka VPP lehse kan iarap ban pynduh noh ia ki seng riewlum juk rim.
Ula ai nuksa ba ka NPP ka dei ka nongmuna, ha kaba shisien mynshwa, la pynbud nam ia ka NPP kum ka party Garo hynrei mynta kala long ka National party, ha kaba ka la pyniar sha Arunachal Pradesh, Nagaland bad Manipur.

U la ong ba ka jingpyniar ia ka party kan pynduh ia ka jingiapait bad kan wanrah ia ka jingiatylli.
Ula ong ba ki paidbah ka rilum Garo ki don ka rukom pyrkhat kaba bha, da kaba kiar na ki seng riewlum namar ka jingiapait iapra jongki bad ki kham jied ia ki kyrtong kiba biang.
Hynrei ka jingjop ka jingroi jong kano kano ka party, ka shong ha ka jinglong ki nongialam.
Ula ong ba ka jingpdiang ia kano kano ka party ka shong ha ki nongialam kiba tbit.