“Pdiang noh ka shithi risaiñ jong nga”

Shillong,17 Risaw:
Mynta ka step ha ka por 9 baje eiei u MDC ka Umroi konstitwensi u bah Albinus Lyngdoh u la leit ia kynduh ia u bah D.D Lapang President MPCC ha ingsah jong u ban dawa ba u dei ban pdiang noh ia ka shithi risaiñ jong u kum u dkhot ka seng Congress. U bah Albinus u la iathuh ba ha katei ka jingiakyn-duh ia u bah Lapang u la ong “Pdiang noh ia ka shithi risaiñ jong nga”.
Ha katei ka jingia-shongkai kaba kumba shiteng kynta eiei u la ong ba u bah Lapang u la khroh ia u hynrei namarba um treh shuh u la ong ba u bah Lapang u la pdiang noh ia katei ka jingrisaiñ jong u.
“Ngi ia shong tang para marwei, ngi ia dihsha kumba ju long, nga ia kren beit da ka ktien sor” ong utei u MDC jong ka Umroi uba dei para nongmihkhmat na Bhoi bad u bah Lapang. Utei u MDC u la ong ba kumba ka long mynta ka seng Congress ka mut ban khniot ia u bah Pynshngaiñ hynrei kam lah satia naba ki don bun kiba ai drip ia u.
U bah Lapang u la pdiang ruh ia ka shithi risaiñ jogn ki ar ngut kiwei pat ki MDC kata u bah Hadrian Lyngdoh bad u bah Victor Rani. Haba pyntip ba ka MPCC ka la pdiang ia ka shithi risaiñ jong ki u bah Lapang u la iathuh ruh ba ka Congress ka la pyndh pyndam noh shipor ia ka Block Congress ha Mawsynram bad Mawkynrew.
Ka MPCC ka la thung ia u bah Khelor Kharnaior kum u President ba thymmai jong ka BCC Mawsynram bad u bah AR Thangkhiew kum u President ka BCC Mawkynrew.