Shillong:Ki hynnriew ngut ki Sordar jong ki Raid kiba hap ha ka Pynursla Civil Sub-Division, ki la pynpaw ba ki pdiang ia ka Sohra District ne ka South East District Sohra, kaba dang thnem bha ka jingdawa haduh mynta.
Ha ka jingpynlait kyrwoh myn hynnin ka sngi, ki sordar jong kine ki Raid ba kynthup ia u Sordar ka Raid Shabong, Sordar Raid Lyngkhat, Sordar Raid Rangnah, Sordar Mukertila, Sordar Raid Mawlam, Sordar Raid Mawshun ki la iakynduh ruh ia u Deputy Chief Minister u bah Prestone Tynsong ban pynpaw ia kane ka sur jongki.
Haba kren bad u Bah KK Tangsong u sordar ka Raid Lyngkhat, u la iathuh ba ki la iakynduh ia u Bah Prestone ha ka 16 tarik mynta u bnai ban pynsngew ha u ba lada ka sorkar ka buh ia ka nongbah ka Sohra District ha eleka Laitlyngkot, ki kloi ban iasoh bad ka South East District Sohra.
Ki la kam ba kane ka jingpynsngew jongki, ka long na ka bynta ban wanrah ia ka jingsuk bad ka jingbiang jong ki paidbah ka Pynursla Civil Sub-Division bad ka Sohra Civil Sub-Division.
Ha ka shithi sha u Bah Tynsong, kine ki rangbah ki la ong, “ki khlieh nongsynshar ki la rai da kawei ka sur ba ki paidbah ka thain Riwar Mihngi hapoh Pynursla Sub-Division kin pyrshah lada pynhap ia ka Pynursla Civil Sub-Division ha South East District Sohra lada buh ia ka ophis u Deputy Commissioner ha Sohra hynrei kin pdiang lada buh ha Elaka Laitlyngkot”.
Ki la ong ruh ba ia kane ka rai jong ki sordar jong kine ki raid dei ban shim kum ka rai jong ki paidbah ka Riwar Mihngi baroh kawei.
Lah ban kdew ba ka Dorbar ka Elaka Umniuh-Tmar Sirdarship ka la pyrshah ban pynngat ia ka Elaka Umniuh-Tmar sha ka Sohra District kaba dang iaid ka jingdawa haduh mynta.