Shillong, 13 Jylliew:
U Myntri Rangbah ka jylla u Dr Mukul Sangma, u la iathuh ba ka State Regulatory Board for Higher Education ka la pdiang ia ka jingai jingmut u Lat ka jylla u RS Mooshahary ban khang dam noh ia ka CMJ University.
“Ka State Regulatory Board ka la aiti ia ka jingai jingmut sha u Deputy Chief Minister ba peit ia ka Education u Prof RC Laloo.
Ka jingai jingmut yn sa buh ha ka jingialang ka kynhun myntri ban shim ia ka rai ba khadduh”, la ong u Dr Sangma ha kane ka sngi Palei.
U Mooshahary uba dei u Visitor jong ka CMJ University ha ka sngi Balang u la bthah ia ka sorkar ba kan pynwai noh ia ka CMJ University katkum ka kyndon Section 48 jong ka CMJ University Act, 2009.
U myntri Rangbah ka jylla u la pynthikna ba ka sorkar kan pynshitom pyrshah ia ka CMJ University bad kumjuh kan long ka jingsneng ia kiwei ki university kiba treikam ha kane ka jylla ban kiar na kaba leh thumur.
“Ngin sa peit ia ki jingai jingmut ka Board bad yn sa shim pynshitom ia kane ka university”, la ong u Myntri rangbah.
Ia kane ka Regulatory Board la khlieh da u Bah Lambha Roy ka la aiti ia ka jinglap jongka sha ka Education Department ha ka 10 tarik Jymmang.
Watla, ym pat iathuh hynrei la ai dak ba ka board ka la lap ia kiba bun bah ki jingduna ha ka jingpyntreikam ia ka CMJ University.
Ka Regulatory Board ka la pynlong ruh ia ka jingtohkit pyrshah ia ka Mahatma Gandhi University jong ka Meghalaya ha Byrnihat bad kan sa aiti ia ka jingshem jongka ha ka 24 tarik Jylliew.
U Chairman jong ka Regulatory Board, u Bah Lambha Roy lem bad ka Director jong ka Higher and Technical Education, ka LR Sangma kum ka convener, ka Dr.(Mrs) MPR Lyngdoh, Prof. Dr Caroline Marak bad T Mark kim ki dkhot. Kane ka Board ka la iakynduh 30 tarik Iaiong bad ka la jngoh ia ki skulbah shimet bad ka la pynmih ia ka jingbthah pyrshah ia ka jingbym biang kiba don ha ka CMJ University ha kajuh ka sngi.
Phi don ban ong eiei?