Pdiang ka SLC T. 123 klur na ka 133.12 klur ia ki projek ka KHADC

Shillong, 18 Nohprah:
Ka State Level Committee (SLC) ka sorkar jylla kaba peit bad bishar bniah ia ki projek ba phah da ki autonomous district council (ADC) na ka pisa ka sorkar pdeng, ka la pdiang tang T. 123 klur ia ki projek ba la phah ka KHADC bad ka pan jingshai shwa na kiwei pat ki projek. La iathuh ba ka KHADC ka la phah kumba 1000 tylli ki projek.
Kane ka SLC kaba shong jingialang ha kane ka sngi Thohdieng, ka la phah ia ka KHADC ba kan bishar bniah shwa ia ka jingphah projek jongka ban shna ia ki jaka sah bad jaka bam ia ki nongjngohkai namar ba kam iaid katkum ka kyndon ba la bthah da ka Niti Aayog, ka sorkar pdeng.
Katkum u dkhot jong ka SLC, u la ong ba ka sorkar pdeng ka la mang T. 133.12 klur ia ka KHADC na ka Special Assistance Scheme mynta u snem. Ka SLC kaba khlieh da u Chief Secretary ka la ong ba ia ki projek, dei ban iaid katkum ki kyndon ba la buh da ka Niti Aayog kaba kynthup ban shna ia ki lynti syngkieng, ka um bam um dih, iarap ia kiba kynduh ia ka jingjulor ka mariang, ki jingkhuid jingsuba, pynbha ia ki surok, ki ding surok, jingthang briew, bad kiwei kiba dei ki jingdonkam u paidbah.
Ha kajuh ka por, ka jingialang ka la pdiang ia ki projek ba phah da ka JHADC kaba T. 33.57 klur.
Ka SLC kham mynshwa, ka la pdiang ia ki projek ba la phah da ka GHADC T. 100. 71 klur.