Pdiang ka kabinet ban thung Komishon ia ki khynnah

Shillong, 28 Jylliew:
Ka jingialang jong ka kynhun myntri hynne ka sngi, ka la pdiang ia ka ban buh ia ka Meghalaya State Commission for Protection of Child Rights (MSCPCR) ban peit ia ki jingeh jong ki khynnah ha kane ka jylla. Kane ka long ba hadien ba la ioh ia ka jingbthah na ka sorkar pdeng ba donkam ban buh ia ka komishon jong ki khynnah ha kane ka jylla.
Hadien ba la wai ka jingialang ka kabinet, u Myntri Rangbah ka jylla u la ong ba la dep mynjur ban buh ia ka Meghalaya State Commission for Protection of Child Rights ha ka jylla khnang ban iada ia ki khynnah kiba don ha kane ka jylla.
U la ong ba shwa ban ioh ia ka jingmynjur na ka kynhun myntri, la pynlong shwa ia ka jingbishar bniah da ki tnad sorkar bapher bapher. U la iathuh ba ka MSCPCR ka la mynjur katkum ka kyndon 17 jong ka National Commission for Protection of Child Rights (NCPCR) Act, 2005 kaba la ong ba dei ban don beit ka komishon ban peit ia ki khynnah ha man ki jylla ha ka ri.
Kane ka rai jong ka sorkar ban buh ia kane ka National Commission for Protection of Child Rights ka long hadien ba ka NCPCR ka la bthah bunsien.
U Myntri Rangbah u la ong ba ka jingdonkam ban buh ia kane ka Commission ka long kaba donkam namar ba ka jingkiew ki kam thombor pyrshah ia ki khynnah ha kane ka jylla.
Ha kane ka Komishon, yn kynthup ia u chairperson bad hynriew ngut ki dkhot kynthup ar ngut ki kynthei. Ia ki Rule jong ka komishon ruh la dep pdiang da ka sorkar.