Pdiang ka Israel ia ki Jew na Mizoram

Jerusalem, 20 Risaw:
Ka Israel, ka la shah ia ki 899ngut ki Jew kiba na Manipur bad Mizoram, kiba dei na ka jaitbynriew.
Ka jingiakynduh jong ka kynhun myntri ha ka taiew ba ladep, ka la mynjur ia katei ka Bnei Menashe, ba kan shong kan sah noh ha Israel, ha kaba la khmih lynti, ba katei ka kynhun ba nyng kong jong kitei ki jaitbyn riew kan wan leit poi, ha kaba kut jong une u snem. Ka jaitbynriew Bnei Menashe,ba la tip kum ki khun jong ka Menashe, ka dei ka jaitbynriew, kaba don ha Manipur bad ha Mizoram, ka dei kawei na ki shiphew jait kiba la jah noh, kaba la shim jingkhein naduh 2,700snem mynshwa.
Ki don da ki bun spah ngut ki jaitbynriew Bnei Menashe, kiba don mynta ha Israel, kiba la leit poi sha katei ka ri, lyngba ka jingiarap lem jong kawei ka kynhun, Shavei Israel, kaba la rai ban leit wad ia ki jaidbynriew Jew,kiba la jah la duh noh na Israel.
U Michael Freund, uba dei u nongseng jong ka seng Shavei Israel, ula ong ba u kwah ba baroh ki jaitbynriew Jew, kin leit poi lut noh sha Israel shen shen.
La iathuh ba ka sorkar Israel, ka la mynjur ia 200ngut ki Bnei Menshe ban leit ialam mynta u snem bad nangta sa 400ngut ha u snem 2014 bad nangta sa 300ngut ha u snem 2015. Kitei kin shong kin sah shwa ha ki iing, ba la pynkhreh da ka Shavei Israel ba hadien kata, kin sa saphred ha ki bynta bapher jong ka Ri. Ki don 274ngut kiba la leit na ki bynta ka Mizoram bad ka Manipur, sha Israel ha une u snem.