Pdiang ka HSPDP, ia ka Kong Grace

Shillong,15K’lyngkot:
Ha ka 7tarik Kyllalyngkot 2014, ka Hill State People Democratic Party (HSPDP) ka la pynskhem ia ka Kong Grace Mary Kharpuri (MDC Nongshken Constituency) kum ka dkhot bapura jong ka Party HSPDP. Ia katei ka kam la pyndep ha Pynursla ha kaba da ki hajar ki paidbah nongshong shnong jong ka thain Riwar ki la wan ban sakhi bad pynskhem lang ha katei ka sngi bakhraw.
Ia ka jingialang ha katei ka sngi la pyniaid da u Bah S.Shemborlang Rynjah, Working President ka HSPDP Pynursla Circle bad shuwa ban sdang ka jingialang la pynlong da ka jingduwai da u Bah F. Kongwang, Sirdar Raid Mukertila. U Bah Samson Suting, President Pynursla Circle u la ai ka jingkren maitphang halor ka jingiaid lynti kumno ba la pynlong ia ka Kong Grace M. Kharpuri ban pyniasoh noh ialade sha ka Party. Ka Kong Grace Mary Kharpuri ha kaba ai jingkren ka la ong ba ka daw bah kaba la pynlong ia ka ban pyniasoh noh bad ka HSPDP ka long kumno ba nang lah shuh shuh ban shakri kham bha ia la ka Ri bad ka Jaitbynriew. Ka la pynpaw ruh ba HSPDP ka dei kawei na ka seng kaba don ia ka nongrim kaba skhem ban shakri beit ia kane ka Ri Khasi.
Ha katei ka sngi la la pynskhem ia ka kong Grace da U Bah Ardent M. Basaiawmoit, MLA & President HSPDP East Khasi Hill District. Ha ka jingkren kum u Nongialam u Bah Ardent u ban tyngeh kumno ban ngin ieit ban shakri ia la ka Ri bad ka Jaitbynriew bad kumjuh ruh kumno ban ngin lah ban pynioh iaka synshar khadar kaba khuid bad kaba don iaka mynsiem ieit ia la ka jong ka Ri. Bad khatduh eh la ioh ia ka jingkren bad ka jingkyrkhu kyrdoh na u President Rangbah duh jong ka Party HSPDP, Bah Hoping Stone Lyngdoh. La pynwai ia ka jingialang da ka jingkren ai khublei na u Bah Wanhun Massar, Vice President Pynursla Circle.