Shillong:Ka Dorbar mang tyngka jong ka KHADC ka la pdiang ïa ka kaiphod ba la wanrah da u EM ka tnat Elaka haba ïadei bad ka jingjied Syiem pura hapoh ka Hima Mylliem, Mylliem Syiemship.
Haba wanrah ïa ka kaiphod hapoh ka Ïing Dorbar Mang tyngka ha ka sngi Balang u EM Elaka u Bah Jambor War u la ïathuh ba na ka daw ka jingieh noh jong u Syiem ba la shah pynsangeh kam shi por u Paiem Latho Manik Syiem na ka daw jong ka jingbym khlaiñ ka met ka phad bad jinglong tymmen ka EC KHADC hadien ba la pyrkhat bha ka la thung noh shwa da u Acting Syiem uba dei mynta u Ainam Manik Syiem.
“Halor ka jingthylli jong ka kam Syiem ka Hima bad hadien ba la dep pynkhreh pura ïa ka thup kyrteng ki nongjied kaba ha ka 11.01.2023 u Returning Officer u la khot thep kyrteng ïa ki briew kiba dei hok ban ïeng kum ki kyrtong ban shah jied kum u Syiem pura ka Hima Mylliem. Ki la don 5 ngut kiba la jubab ïa katei ka jingkhot kiba kynthup ïa u Bah Samran Sing Syiem, u Bah Pynshailang Syiem, u Bah Banteilang Syiem, u Bah Ainam Manik Syiem bad u Bah Mansan Manik Syiem ha kaba la pdiang ruh ïa ki kot ki sla,” ïathuh u EM Elaka.
Ha ka kaiphod u EM Elaka u la ïathuh ba ïa ka ilekshon la pynlong ha ka 20.02.23 hapoh Conference Hall KHADC. Na ki 41 ngut ki nongjied, 31 na ki nongjied ki la wan thep vote bad ïa ka jingmih (Result) la pynbna hi ha kajuh ka Sngi.
“Hadien ba la dep ñiew ïa ki vote hadien ka ilekshon la shem ba u Bah Samran Sing Syiem u khlem ïoh vote, u Bah Pynshailang Syiem ruh u khlem ïoh vote, U Bah Banteilang Syiem ruh u khlem ïoh vote eiei, u Bah Mansan Manik Syiem ruh u khlem ïoh vote eiei bad tang u Bah Ainam Manik Syiem uba la jop ïa ka ilekshon da 31 ngut kiba wan thep vote,” ïathuh u EM Elaka.
U la ong ba ka EC hapoh ka kyndon 5 ka Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong jong ka Mylliem Syiemship) Act, 2007, ka Council ka la mynjur bad thung ïa u Bah Ainam Manik Syiem uba la shah jied khlem da don kiba ïaleh pyrshah ban long u Syiem ba pura shyrta jingim, hapoh ka Hima Mylliem.
Phi don ban ong eiei?