Pdiang ka BJP, ia ki mat iakren halor ka IOA, ILP bad pyrshah UCC, kumba dawa da ka Dr Fenela

Shillong: Ka doktor jong ka ain, ka Dr. Fenela L Nonglait ka la rung bad pan tiket na ka seng BJP ban iakhun ia ka MP elekshon sha ka Lok Sabha na Shillong Parliamentary constituency. Ia kane ka la pynthikna mynta ka sngi hadien ba la kren sha ki lad pathai khubor.

Ka Dr. Fenela kaba dei ka Khristan ba ngeit niam bha, ka dei ruh ka nongiasaid ain ka Supreme Court, ka la rung sha ka BJP hadien ba ka party ka la pdiang ia ki kyndon ba ka la buh, kiba kynthup ban ithuh ia ka soskular hapdeng ki Hima Khasi bad ka sorkar India ka Instrument of Accession (IoA) ban pynskhem ia ka riti dustur, ka khyndew ka shyiap, ban pyllait ia ka Uniform Civil Code (UCC) ia ka jylla, ban pynrung ia ka ktien Khasi ha ka khyrnit ba phra ka riti synshar ka ri, ka Eastern Bengal Frontier Regulation Act 1873 lane ka Inner Line Permit (ILP), ban pyllait ia ka Right to Fair Compensation and Transparency in Land Acquisition, Rehabilitation and Resettlement Act, 2013namar kan pyniap ia ka Meghalaya Land Transfer Act 1972.

“Ka jingdonkam kyrkieh ka jaitbynriew ka dei ia kine ki ain. Nga lah ban dang samla, ka por ban iakhun elekshon ka don bun hynrei kaei kaba pyllong ia nga ka long ba ngam lah ban ap ia ka por na bynta ka jaitbynriew, ka por jong ka jaitbynriew ka la donkam kyrkieh ia ka jingiada da ki ain”, ka la ong ka kong Fenela.

Ka la ong ba ka jingsang ne ka jingisih ia kiwei, kam dei ban long ka jingtim ia ka jaitbynriew, namar ba kum ki Khristan, dei ban ieid ia ki nongshun bad ioh ban khang ia u nongtuh napoh kan long kaba kham bha ban ia kaba shu ia kaw kaw.

“Ka jingisih jong ngi ia kiwei, kam dei ban long ka jingtim ia ngi. Nga rung sha ka BJP kum ka Khristan, kum ka rit paid, kum ka Khasi, kum ka kynthei. Mynshwa nga long shit (orthodox) Khristan, hynrei mynta ngi hap ban long diplomatic ne iakhun da ka buit. Bun ki jingiatyngkhuh ha ka ain kam dei ia ka sorkar BJP hynrei ngi ialeh ma ngi para Khristan hi. Ka elekshon kam dei ka kam ban ialehkai hynrei ngi dei ban sngewthuh ba ka dei ka thma bah ka jaitbynriew”, ka la ong.

Ka la ong ba lada kum ka jaitbynriew ki sngewthuh ia ki jingma, ki dei ban ailad ia ka, ba kan leit iasaid ha Parliament bad ban iakhun ia ki jingdawa ka jaitbynriew ha ka sorkar BJP kum ka MP.

“Ka la don ka jingkynnoh bun bha ia nga ha kine ki sngi, ba nga rung BJP ba la shah thied dor rem hynrei ka dor ka jaitbynriew ka dei ka bym lah ban thied ne die”, ka la ong.

Kam don jingmut ban ia kaw kaw maw maw ha madan ban iakhih ynda la long ain, hynrei ka donkam ban shim lypa ia ka jingiada, bad ka donkam ban long ka sur kaba khlain ha ka parliament ym ban isih ban long pynban ka jingtim hi ia ka jaitbynriew.