Pdiang ka BJP, ba hiar shuki u Lat

Shillong, 27 lyngkot:
Ka BJP Meghalaya ka pdiang ia ka jinghiar risain u Lat ka jylla u V Shanmuganathan khnang ban ailad ia ka jingtohkit kaba khuid bad kaba shai.
Haba iakren mynta ka sngi, u President ka BJP Meghalaya u Bah Shibun Lyngdoh u la ong ba ka party ka pdiang sngewbha ia ka jinghiar shuki u Lat ka jylla u V Shanmuga-nathan khnang ban ioh ia ka jingtohkit kaba khuid ban lap ia ka jingshisha baroh.
“Hadien ba la iohi ia ki jingshah kynnoh ha ki lad pathai khubor, ki bor ba halor jong ka party, kila bthah ia u Lat ba un hiar shuki bad u la phah ia ka shithi iehnoh kam ha ka 26 tarik mynta u bnai bad la pdiang ruh ia kane ka jinghiar shuki, la ong u Bah Shibun.
U la ong ba ka jinghiar shuki u Lat ka long ban wanrah ia ka jingtohkit kaba khuid ban lap ia ka jingshisha halor ki jingkynnoh baroh la ki dei kiba shisha ne dei tang ki jingpynthoh bria. “Lada ka jingtohkit lap ba u la leh ia kane ka kam shait kynthei, ai ka ain kan pynshitom ia u katba ka ain ka sngew dei bad lada lap ba ka dei tang ka jingiasuh buit ban pynthoh bria ia u ruh, ai ka ain ka pynshitom ia kita kiba don kti”, la ong u Bah Shibun. U Shanmuganathan uba 67 snem ka rta, u la shimti kum u Lat ka jylla mynta tang kumba ar snem eiei bad u la peit lang ruh shipor ia ka Arunachal Pradesh shwa ba un risain noh. U dei u dkhot jong ka RSS mynshwa bad la thung ia u kum u Lat ka jylla da ka sorkar NDA ba ialam da ka BJP.
U Lat u la hiar shuki hadien ba la shah kynnoh leh tam ia ka kyrtong ba iakhun ia ka eksam kam Public Relation Officer (PRO) ha ophis ka Raj Bhavan ha ka por ba interbiw kam, bad ia kane, la pynpaw pyrthei ha ka lad pathai khubor, ha kaba la kyrshan ruh kumba 80 ngut ki nongtrei ka Raj Bhavan kiba la pynher shithi jingujor sha u President ka ri, u Pranab Mukherjee bad sha u Myntri Rangbahduh ka ri, u Narendra Modi.