Pdiang burom ka khadsawphra ia u samla iakura u Sumarlang

Shillong: Ka Khadsawphra College myn hynnin ka sngi kala pynlong ia ka jingpdiang burom ia u samla Sumarlang Marwein u ba pule ha ka klass XII (Arts) u ba la ioh khur ia ka takma ksiar na ka lumpung ialehkai Karate Do na Hongkong.
U Samla Sumarlang u la mihkhmat ia ka India ha kane ka jingialehkai kaba long ha ka 9 bad 10 tarik mynta u bnai.
U la jop ha ka jingiakhun para marwei ha ka kyrdan jong ki para baheh ka kyrdan Black Belt.
Na ka liang jong ka College kala dap da ka jingkmen halor kane ka jingjop ka jong u bad mynta ka sngi ka College kala pynlong ia ka jingpdiang burom ia une u samla pule.
Ia kane ka lyngpung jingialehkai la pyniaid da ka “Eagle Commando International Martial Arts Shorin Ryu Shido u ban a Texas jong ka Ri United State jong ka America.
U Principal jong ka College u Bah Boldness Lyngdoh Nongum ryngkat ki samla pule jong kane ka College kila pdiang burom ia u bad kila ai ka jingkyrkhu kyrdoh ba u dang kiew irat ha kane ka jingialehkai bad un dang wanrah burom shuh ym tang ia ka College hynrei ia ka Ri bad ia ka jylla baroh kawei.