Pawnam ka ‘Ri’ na Goa, yn wan biang sha Bijou

Shillong, 9 Nohprah:
Ka Phlim –Ri – ka phlim Khasi, kaba nyng kong eh ban ioh ia ka National Film Award bad kaba la shah jied kum kawei na ki 26 tylli ki phlim na kylleng ka ri India ha ka Indian Panorama Feature Film Section ka la ioh jingiaroh hadien ba la pyni paidbah ia ka ha Goa ha ka 45th International Film Festival of India. Katei ka phlim kaba la shna da u bah Pradip Kurbah kan wan phai biang sha nongbah Shil long ha Bijou Cinema Hall naduh ka 12 tarik mynta u bnai khnang ba ki paidbah kiba dang angnud ban peit ia ka kin ioh lad biang sa shisien.
U nongpynmih ia katei ka phlim u bah Pradip Kurbah, u la pyn paw ka jingkmen ba ym tang ki briew kiba na kane ka ri kiba peit ia katei ka phlim, hynrei ki don ruh ki briew na kiwei pat ki ri kiba wan ban pyndap ia ka INOX hall ha Goa ban peit ia ka phlim Ri. U bah Kurbah u la pynpaw ka jingkmen ba u la ioh lad ruh ban ia mir jingmut bad kiwei kiwei ki nongshna phlim bad nongbei tyngka ha ka kam shna phlim.
Uwei na ki nongwan jngoh phlim uba tista jong ka IFFI, u Giovanni Rossi na Italy ula ong, “Kum kine ki nongshna phlim ki dei ban ioh ia ka jingkyrshan, namar ki don ym tang ka sap, hynrei ka jingthrang ruh. Nga kitbok ia ka jylla Meghalaya ba kan nang kiew shuh shuh ha ki bynta shna phlim.” U Pady Gajageshwar uba long uwei na ki aktor bad nongthoh Marathi, ula long uba nyngkong eh ban ai khublei ia u Merlvin Mukhim tang shu kut ka phlim. “Ngam lah mutdur haduh mynta ruh ba nga dang shu dep peit ia ka phlim na Meghalaya.  Nga sngew shisha ba ka iahap ka jingtbit bad ki phlim kiba na kylleng ka ri hi baroh kawei.”
U Merlvin Mukhim haba pynpaw ia ka jingsngewhun ban ioh shim bynta ha ka festival u la bynrap, “Kane kadei ka lad bad ka jingplie lynti kaba kongsan ha ka jingiaid lynti jong nga kum u tyngshop. Nga kyrmen ba kiwei kiwei ki paralok khynnah, samla bad rangbah kumjuh kin ioh ban sei madan ia la ka sap ka phong ha ka rukom kaba janai, ha ki rynsan kiban long kiba ai mynsiem, bad kaba wanrah jingmyntoi ia ki lyngba ka jingkyrshan pura ki bor kiba don.”