Paw tyngkrein, ia ka bor ki dorbar shnong ha Meghalaya, lyngba ka mat ba leit rah U MP ha Rajya Sabbha

Shillong:Mynhynnin ka sngi, U Rakesh Sinha, MP jong ka Rajya Sabbha, ula buh jingkylli, ia u myntri ka tnat pynroi sha ka thain shatei lam mihngi, halor ka jingdon bynta ki dorbar shnong, ki dorbar Raid, dorbar Hima, ha kaba kyntiew ia ka ioh ka kot jong ka Meghalaya bad nangta, u buh jingkylli shuh, ba ka sorkar India, kan ailad ne em ia ki, ba kin pynneh pynsah ia ki khlaw ki btap, khamtam ia ki lawkyntang bad nangta, ula ong shuh shuh, ba ka sorkar India, kan ailad ne em ia ki, ba kin shim bynta kham bha, ha ki kam pynroi ha ka jylla Meghalaya.

Haba jubab, U G Kishan Reddy, myntri ba peit ia ka thain shatei lam mihngi, u iathuh, ba ki dorbar shnong, ki trei kam bha, ha kaba tei ia ka ioh ka kot, ka kamai kajih jong ka Jylla bad ki long ruh, kiba don bynta ha ka jingpynneh pynsah ia ka mariang, kum kaba pynneh ia ki lawkyntang, ka jingpom pathar ia ki dieng ki siej, ka jingpynneh pynsah ia ki tyllong um, ka jingkhanglad ia ka jingsiat pathar ia ki mrad bad la iathuh ba ka sorkar Meghalaya, ka la pyntreikam ia ka ain, kaba la tip, kum ka Community Reserves under Wildlife (Protection) Act, 1972, kaba dei halor ka jingpynneh pynsah ia ki lawkyntang. Nangta sa ka skhim jong ka sorkar India, kaba la tip, kum ka Integrated Development of Wildlife Habitats and the Compensatory Afforestation Fund Management and Planning Authority (CAMPA), ka la plie lad shibun ia ki trai shnong, ha ka jingioh kamai kajih jongki, na kane ka skhim pynneh mariang bad la ong shuh shuh, ba ki dorbar shnong, ki la nang treikam bha, ha ki kam pynroi, kum kaba ki ai jingkyrshan ia ki Village Employment Council (VEC) bad ban jied ia ki nongioh jingiarap, ban ai jaka ia ki jingtreikam bad kumjuh ruh ban pynneh pynsah ia ki khlaw ki btap.