Nongpoh: Ka Pakhang shnong kaba la khot da ka North East students’ Organisation (NESO), ka la long kaba iaid beit iaid ryntih ha Ri Bhoi bad kam shem la don kano kano ka jingjia kaba wanrah ia ka jingsngewsih, hynrei ka shu don tang ka jingiathang Taiar kali ha ki katto katne ki jaka jong ka surok bah NH-6.
Wat la ka dei ka pakhang shnong, kaba khlem wanrah ia kino kino ki jingjia kiba sngewsih, hynrei la iohi ba ki paidbah ha Ri Bhoi ki ai ka jingkyrshan kaba pura ia kane ka pakhang shnong, la iohi ba bun ki jaka ba kham bun briew ha Ri Bhoi ki kynjah, ha kaba jan baroh ki dukan ki khanglut bad ki surok ruh ki long kiba kynjah wat haduh ka por 8 baje mynmiet, kata 3 kynta hadien ba la kut noh ka por pakhang shnong kaba la sdang naduh ka por 4 baje mynstep haduh ka por 5 baje janmiet.
Kum ban shu pynkynmaw hangne, ba ka NESO ka la pynlong ia kane ka pakhang shnong ha baroh ki jylla kiba don Shatei Lam Mihngi na kata ka (Northeast Bandh), kaba long kum shibynta ban pyrshah jur halor ka jingthmu pyntreikam noh ia ka Citizenship (Amendment) Bill 2016.