Pass kam nos, sa kiba khlem ialeh eksamin, kynnoh ki samla

Shillong, 30 Nailar:
Ki samla ki ba pas nurse ym na ka bhah jong ka sorkar (non-bonded) ki la dawa ba ka sorkar ka dei ban pynsahngeh shwa shipor ia ka jngthung kam namar ki la kynnoh ba ki la pyn pas ia ki ba khlem ialeh eksamin ruh.
U Melchior Hero Riang uba iakhun ia kane ka eksamin, u la kynnoh ba ka sorkar ka leh shiliang ha ka thung kam thung jam, namar ia ki ba wan ban ia leh ia ka eksamin ki khlem pas, hynrei kito ki ba khlem wan ialeh eksamin ki pas.
“Kawei ka briew ka la pas khlem wan ialeh ia ka eksamin”, la kynnoh u Bah Hero bad bynrap ba kane ka jingleh ka bym lah ban pdiang bad dei ban pynsangeh noh ia ka jingpynrung kam.
U la ong ruh ba ka sorkar ka la leh shilliang namar ba ia kito ki ba pas nurse na ka bhah jong ka sorkar (bonded) kim pynialeh ia ka written eksam hynrei ia kito ki ba leit pule na lade (non-bonded) ka sorkar ka hap ban ialeh iaka written eksam.
“Lada ka sorkar ka thung ia ki bonded lyngba ka interview ia ki non-bonded ruh ka sorkar kadei ban leh kumjuh katba ka rta ka jong ki ka dang biang ban applai ia ki post”, la ong u Bah Hero.
U la ong ruh ban pynkhlain shuh shuh ia ka jingiakhun u la ong ba kin thaw noh ia ka kynhun bad u la kyrpad ba kito baroh khoit ki ba pas ym da ka bhah jong ka sorkar ba kin wan ban ia kyrshan lang.
Na ka liang jong kito ki ba pule na ka pla lajong ki la dawa ba ka sorkar kadei ban thung kam kumba leh ia kine ki ba pule na ka bhah jong ka sorkar bad la ong ruh ba ka sorkar kadei ban ai bhah mar kumjuh ia ki ba pule na ka pla lajong bad ia kito ki bapule naka bhah jong ka sorkar.
Ki la dawa ruh ba ka sorkar nyngkong ka dei ban ailad shwa ia ki briew kiba dei ki trai jylla jong ka Meghalaya namar ki trai jylla ki kham shai ha ka ktien ka tylliej.
Kine ki samla pule nurse ki ba lut na ka pla lajong ki la ong ba ka sorkar kadei ban kem ban pynshitom ia ki ba donkti ha kaba iarap ia kata ka briew kaba mih kyrteng khlem da ialeh ia ka eksam.
Ha kawei ka liang ruh kine ki samla kila kyntu ia ki sengbhalang ba kin peit ban iarap lang ia ki. Bad na ka liang jong ki la rai ba lada ka sorkar kam lah ban pynsahngeh shwa iakane ka jingthung kam ki ruh ki rai ban sangeh ban treikam.