“Para khasi, ngin wad ki lad ki lynti”

Shillong, 23 Nailar:
Ka HNLC ka la thoh shithi sha u Kiren Rijiju u myntri khynnah ka sorkar pdeng uba peit ia ka tnad pohing bad ia katei ka shithi ka la thoh ba ka pynsngew lyngba ki lad khubor halor ka jing kren jong u bad ka kong Roshan Warjri, myntri kam pohing ka jylla ha ki lad khubor.
Ha katei ka shithi kaba la soi da u bah Sain kupar Nongtraw Publicity Secretary ka HNLC ka la ong ba katkum ka jingia kren jong ka bad ka kong Roshan Warjri, ka kong Roshan ka la kular ba kan thaw ia ki lad ki lynti ban ia kren ia suk bad ka la ong ba ‘ngi dei para khasi ngin thaw ia ki lad na ka bynta ka jaitbynriew’. Hynrei ka la ong ba katei ka jingiakren bad ka kong Roshan ka la kylla da khongpong pynban naba ha ka jaka ban phai khmat sha ka HNLC u myntri rangbah ka jylla u Dr.Mukul Sangma u la pynleit jingmut pynban tang bad ka ANVC bad ANVC-B.
Ka HNLC ka la ong ruh ba ka sorkar ka kwah ba ki dkhot jong ka HNLC kin wan ia suk da kaba wan pyndem, “Kaei ka jingkular ban gin ym shah shet kylla?” ong ka kyrwoh khubor. Ka la ong ruh ba ka sorkar jylla ka la thok bad shukor pyllein pyllein da kaba kular ia katei ka seng ban thung noh ia u ksiang u ban wanrah ia ka jingiakren ia suk, hynrei ka la shu kut noh khlem oi shano shano ruh.
Ka la ong ba ka sorkar India ka la khot ia kren ia ka seng lehnoh NLFT kaba don ha Tripura bad mynta katei ka seng ka la rai ban sangeh noh ka kieng atiar, balei ym shym la ailad ia ngi ruh ban ia kren ha katei ka juh ka rynsan, balei la shu leh meinah ia ngi, balei? ong biang ka kyrwoh khubor na ka HNLC.
Ka HNLC ka la ong ba baroh shi katta ka la shaniah ha ka sorkar da kaba khaprip noh la ki khmat , hynrei ka la shah thok pynban ha ka sorkar bad mynta ka la ong ba ka la khyllie biang ki khmat , ‘ngi la ia snohkti lang bad kiwei pat ki seng lehnoh ka thain shatei lam mihngi, bad mynta ngim salia shuh la ngin shah khot ia kren ne ym don ba khot ia kren, namarba ngi la shah thok na ka por sha ka por ha ka sorkar jylla’ ong katei ka kyrwoh khubor. Shuh shuh ka la ong ‘Lada ka sorkar kam khot ha ka miej ka jingiakren, ngi long kiba la khreh ban ia khun ha ki surok bah ne ki jaka long iew long hat’ ong katei ka seng kaba la pynpaw shibun kiei kiei halor ka jingiakren ia suk ha ka shithi kaba ka la thoh sha u Kiren Rijiju.