Panmap ka longkmie, ba buh dur ksuid u khun ha pung Langkawet

Shillong:Ka longkmie, ka la panmap na ka bor pyniaid jong ka Rabit Lake & Resort Tourist Spot Committee, kaba long ka nongpeit ia jaka jngohkai ha Langkawet, Raid Nongkhlieng.

Kane ka jingpan map jong kane ka long kmie kadei hadien ba u khun jongka, u la kum buh dur kai ba la shna (photoshoped) da ka dur ksuid ha ka pung Langkawet, kaba la pyntieng ia ki paidbah nongwankai bad ktah jur ia ka nam bad ka burom jong kane ka jaka jngohkai, haduh ba ki briew ki la artatien ban leit kai.

Ka kong Jordamon Kharwan na ka shnong Mawpran harum Pynursla, ka la panmap ha khmat ki nongpyniaid mynta ka sngi hadien ba ka bor pyniaid ka ka Rabit Lake & Resort Tourist Spot Committee ka la ujor ejahar ha ka 04 tarik mynta u bnai hadien ba kane ka dur ksuid ba la shna kai da u khun jongka, ka la saphriang ha ki social media kum ha WhatsApp, Facebook haduh ba ki briew ki la tieng ban leit kai sha katei ka jaka.

Hadien ba la ioh ia ka jingpan map, na kane ka longkmie, ka bor pyniaid ka la rai ban ia map bad ban iasuk noh hynrei ha kajuh ka por, ka la maham bym dei shuh ban mlien shuh nangne shakhmat ia kiwei ruh kumjuh.
Ha kane ka jingiakynduh la don lang u bah OP Pyngrope, u chairman ka Rabit Lake & Resort Tourist Spot Committee, u bah A Pyngrope u Secretary bad u bah P Lyngdoh u Manager ka ka Rabit Lake & Resort Tourist Spot Committee, u Sordar bah P Khongstid bad kiwei.