Panmap ka BJP ba khein poi wir, ia ki Dong Mihngi

Shillong, 4 Rymphang:
Ka BJP ka la pan map na ki paidbah ka thain shatei lammihngi ka India halor ka jingbakla thoh ha ka ‘Vision Document’ jong ka seng, kaba la pynlong ia ki briew na kane ka thain kum ki poiwir.
“Ki nongialam jong ka party ki la pynshai ba kam dei ka jingthmu khnang hynrei ka dei ka jingbakla. Nga kyntu ia ki paidbah kane ka thain ba kin nym sngew mong ia kane ka jingbakla”, la ong u general secretary ka BJP Meghalaya u Dipayan Chakraborty ha ka kyrwoh ba la pynlait mynta ka sngi.
U la ong ba ka sorkar BJP kaba la ialam ha ka sorkar pdeng ka kut jingmut na ka bynta ban wanrah bad ban ai ia ka jingshngain ia ki paidbah kane ka thain ha ka nongbah bad ha kiwei ki bynta jong ka ri.
“Ngim dei ban klet ba u Myntri Rangbahduh ka ri u Narendra Modi u la phaikhmat kyrpang ia kane ka thain na ka bynta ban ai ia ka jingshngain ia ki paidbah kiba shong ha ki bynta jong ka ri”, la ong u Chakraborty.
Na ka liang jong ka North East Congress Coordination Committee (NECCC) ka la pynrem jur ia ka BJP kaba la khein poiwir ia ki briew na kane ka thain shatei lammihngi ka India kumba la paw ha ka Vision Document jongka kaba la pynlait paidbah.
U chairman ka NECCC) uba dei ruh u president ka Meghalaya Pradesh Congress Committee Bah DD Lapang u la pynrem ia kane ka jingleh bad ka jingniew bein ka BJP ia ki briew kane ka thain kaba la paw ha ka manifesto ka BJP kaba pynlait paidbah hynnin ha Delhi.
“Kane ka dei ka jingkren ibein ia ki briew kane ka thain bad ka seng ka pynrem jur ia kane”, la ong u Bah Lapang ja ka kyrwoh ba la pynlait sha ki lad pathai khubor.
U Bah Lapang u la ong ba ka jingpynshai jong ka BJP ba ka dei ka jingbakla, ka pyni ba kane ka seng kam khein snep ia ki paidbah kane ka thain bad ka jingleh tang dep.
U Bah Lapang u la ong ba ka BJP ka la thmu ban wanrah ia ka jingniew bein bad ka jingshah shiliang ha ka ri bad ka ri ka dei ban ioh jingsneng na kane ka jingleh ka BJP.
U la ong ba ym don jingthew shuh ia ki paidbah kane ka thain ban pynjem ia ka jingsngew mong halor kane ka jingkren bein ka BJP ia ki paidbah kane ka thain.
Kane ka dei ka jingleh meinah kane ka sorkar bad u la ong ba ka NECCC ka kyrmen ba ki paidbah ka Delhi kiban jied ia ki nongmihkhmat ha ka 7 tarik mynta u bnai kin sngewthuh ia kane ka jingleh bym dei ka BJP.