Pan tiket MDC U bah HS Shylla na ka UDP na Nongkrem

Shillong,19 Iaiong:
U MLA bad MDC barim ka Nongkrem Konstitwensi u bah H.S Shylla u la pan tiket na ka seng UDP na ka bynta ban ia aireng ha ka elekshon MDC shiteng samoi. Katkum ka jingtip kaba u Rupang u la ioh lum la ong ba ia ka aplikeshon u bah Shylla u la phah sha u President Rangbah ka UDP u Dr.Donkupar Roy. La iathuh ba ki don ar ngut ki nongpan tiket na ka seng UDP na bynta katei ka elekshon MDC shiteng samoi bad utei u dei u bah H.S Shylla bad u bah Edar Lyngdoh Nongbri uba dei u MDC barim ka Nongkrem.
Hynrei la ioh jingtip ba kitei baroh ar ngut ki don ia ka juh ka sur bad ki la poi sha ka jingiasngewthuh jingmut ha kaba u bah Edar u la weng noh ia ka aplikeshon jong u ban ailad ia u bah Shylla ba un ia aireng ha katei ka elekshon MDC na Nongkrem. La sngewthuh ba ha ka elekshon MDC shiteng samoi ka ban wan u bah Shylla un ia khun na Nongkrem Konstitwensi na ka tiket UDP. La ioh jingtip ruh ba mynhynin ka janmiet u bah Shylla u la pynlong jingialang ha Nongkrem ban pynshai paidbah ia ki skhim kiba ki nongmihkhmat ki ioh kaba kin hap ban sam sha ki paidbah. Lah ban pynkynmaw hangne ba ka Nongkrem konstitwensi ka la shong khlem MDC hadien ka jingrisaiñ noh u bah Ardent M Basaiawmoit na ka kam MDC uba la bat ha ka juh ka pork um u MLA bad MDC katei ka konstitwensi.
Lah ruh ban kdew ba u bah H.S Shylla u la long teng ruh uMLA jong ka Nongkrem bad u CEM jong ka KHADC uba la rai ban shongthait noh na ka kam politik hynrei katkum ka jingtip u nongthohkhubor la ong ba ka jingmih pyrthei biang jong u mynta ka dei namar ka jingshah pynbor bad ka jingleit khroh biang ki briew na katei ka konstitwensi ba un ia khun elekshon biang bad la ong ba kiba bun na ki briew kiba leit khroh ia u ruh ki dei hi kiba ju ieng pyrshah ia u ha ki elekshon ba la dep.